Alibeaj u tërhoq nga rekusi i vulës së PD, Basha: Ne nuk heqim dorë edhe pse jemi kërcënuar!

Teksa Enkelejd Alibeaj ka vendosur të tërhiqet nga rekursi në Gjykatën e lartë për vulën dhe logon e PD, Lulzim Basha jo.

Demokratët Euroatlantikë, të drejtuar nga Lulzim Basha, kanë reaguar pas raportimeve të tërheqjes nga rekursi në Gjykatën e Lartë të Enkelejd Alibeajt.

Në një njoftim të shpërndarë sot (4 mars), theksohet se ata nuk kanë hequr dorë nga shqyrtimi i rekursit në Gjykatën e Lartë.

“Çdo kërkesë e depozituar sot, nga individë që nuk janë pjesë e Partisë Demokratike/ Demokratët Euroatlantikë, ka zero efekt në këtë proces. Ata që kanë shpallur sot tërheqjen janë vetëdemaskuar, si autorët e një shantazhi politik për interesa të ngushta personale. Vetëm dy ditë më parë drejtues të Koalicionit Euroatlantik /PD – Demokratët Euroatlantikë, janë kërcënuar, se nëse Koalicioni Euroatlantik, nuk do t’ju nënshtrohej kushteve për bashkëpunim, duke hequr dorë nga identiteti ynë politik, do të përballeshin me tërheqjen nga rekursi në Gjykatën e Lartë”, thuhet në reagim.

Më tej theksohet se beteja do të vazhdojë dhe se nuk ka shantazh që i bën që të tërhiqen.

“Demokratët Euroatlantikë e kanë provuar me vepra, se nuk ka forcë të na shantazhojë dhe se nuk biem pre e asnjë presioni. Ne kemi qëndruar dhe qëndrojmë për parime dhe vlera. Duhet të marrë fund koha kur interesat politike i mbivendosen të drejtës në këtë vend. Ne do ta vazhdojmë pa u ndalur, betejën ligjore dhe i kërkojmë Gjykatës së Lartë të marrë një vendim sa më shpejt, bazuar në ligj, pa u ndikuar nga presioni, shantazhet apo lojërat politike që synojnë të marrin peng Partinë Demokratike për tu mbrojtur nga drejtësia”, përfundon reagimi.