Një vrasje ka ndodhur në Ferizaj, në orët e para të mëngjesit të ditës së sotme. I vrarë ka mbetur një 30-vjeçar, me inicialet G.H, derisa i dyshuar për vrasjen është po ashtu një 30-vjeçar, me inicialet Q.J. Viktima duket se ka qenë shok i reperit Fero, i cili pas lajmit ka reaguar menjëherë në rrjetin e tij social Instagram.
Fero ka publikuar një foto me të në Instagram, duke shkruar edhe një mesazh ngushëllues “Allahu n’xhenet vlla”.
Lidhur me ngjarjen e rëndë, policia e Ferizajt përmes një komunikate për media ka bërë të ditur se një person ka mbetur i vrarë në orët e para të mëngjesit të sotëm në rrugën “Rexhep Bislimi” në Ferizaj. Siç tregon Policia në komunikatë, i dyshuari ka refuzuar urdhrat verbal të Policisë, derisa me pistoletë në dorë iu kthehet zyrtarëve policor. Një nga policët, siç thotë komunikata, me qëllim të shmangies së rrezikut ndaj tij dhe kolegëve, e ka përdorur armën zyrtare me një shkrepje në drejtim të të dyshuarit.
I dyshuari është dërguar menjëherë në Qendrën e Mjekësisë Familjare në Ferizaj dhe më pas për tretman në QKUK. Gjendja e tij është stabile dhe jashtë rrezikut për jetë. Me rastin është duke u marrë edhe Inspektorati Policor i Kosovës.
Discussion about this post