Deklaratat e deputetit bënë shumë bujë në parlament, madje duke shkaktuar të qeshura nga të pranishmit në sallë, por për Saimir Korreshin është mënyra më e mirë për të treguar realitetin.
Deputeti lushnjar ka reaguar në lidhje me deklaratat e bëra në kuvend, ku me anë të tyre ka dashur të tregojë realitetin në qytetin e tij. E zgjedhur në këtë mënyrë për shkak se gjuha e përdorur duhet të jetë sa më e thjeshtë që të kuptohet nga qytetarët.
“Të hysh në Spitalin e Lushnjës të del miu nga këmbët e mos dish nga të vesh. Ku jetoni ju, në çfarë bote? Miu thyen kokën…”, deklaronte në sallë Korreshi.
Në lidhje me këtë deklaratë, deputeti u shpreh se donte të tregonte situatën alarmante në të cilën ndodhet vërtet spitali i Lushnjës. Pacientët shtrohen në mëngjes, por detyrohen të dalin nga spitali në darkë, pasi mungojnë kushtet e nuk mund të qëndrohet. Sipas tij, qeveria propagandon, por në të vërtetë situata është totalisht ndryshe. Ishte një deklaratë spontane e jo si e kolegëve deputetë, të cilët i kanë të gatshme.
“Po të verifikosh ambulancat e Lushnjës njëra ka djegur motorin dhe akoma nuk është rregulluar 2 të tjera janë për skrap dhe 3 që kanë ngelur janë hapa dollapa mjerë ai që shtrohet mbrapa”, shprehet sërish me një deklaratë tipike të tijën, deputeti.
“O ju rruani lekët, o ju keni frikë e ja futni vrapit”, ishte një tjetër deklaratë e tij.
Ai pohon se nuk e humbet toruan kur flet, madje as pas të qeshurave të deputetëve në kuvend, pasi qëllimi i tij është përfaqësimi i Lushnjës.
Problemet në qytet nuk kanë fund, veç spitalit janë dhe një sërë problemesh të tjera. Një prej sektorëve në krizë është dhe blegtoria, ku blegtorët kanë falimentuar.
“I gjithë fshati po blen qumësht në qytet, sepse lopët janë zhdukur, kanë ikur në drejtim të paditur. Njerëzit e kanë të pamundur të mbajnë lopë. Në fshat është frikë se nuk e ndjen më erën karakteristike të lopës më. Kanë filluar të bëhen specie në zhdukje”, tha Korreshi.
Duket se dhe jashtë kuvendit, Korreshi reagon po në të njëjtën mënyrë, ku deklaratat e tij janë sa komike aq edhe tragjike për shkak të gjendjes së krijuar.
