Talebanët kanë torturuar dhe “masakruar” brutalisht disa pjesëtarë të pakicës Hazara të Afganistanit muajin e kaluar, sipas organizatës ndërkombëtare “Amnesty International”.
Sipas organizatës ky është një “tregues i tmerrshëm” që flet për sundimin e grupit militant sunit dhe një shenjë që talebanët nuk kanë ndryshuar pavarësisht se ata pretendojnë një gjë të tillë.
Sekretarja e përgjithshme e Amnesty International, Agnes Callamard tha se “brutaliteti gjakftohtë i këtyre vrasjeve sjellë në kujtesë veprimet e kaluara të talebanëve, dhe është një tregues i tmerrshëm i asaj që mund të sjellë sundimi taleban në Afganistan“.
Në një raport të botuar më 19 gusht, Amnesty International tha se nëntë burra Hazara u vranë midis 4 dhe 6 korrikut në rrethin Malistan në provincën lindore të Ghaznit.
Fshatarët të cilët kanë thënë se pas intensifikimit të luftimeve midis forcave qeveritare dhe talebanëve, ata ishin detyruar të iknin në male për të mbrojtur veten, por kur ishin kthyer për të marrë ushqim ata ishin zënë në pritë nga militantët.
Në total thuhet se gjashtë burra u qëlluan, disa në kokë dhe tre u torturuan për vdekje, duke përfshirë “një burrë që u mbyt me shallin e tij”. Komuniteti Hazara është grupi i tretë më i madh etnik i Afganistanit. Hazarët etnikë kryesisht praktikojnë besimin islam duke u përballur me diskriminim dhe persekutim afatgjatë në Afganistanin.
