Për deklaratën e Sekretarit të Përgjithshëm të Partisë Socialiste Damian Gjiknuri për amnistinë fiskale, ka reaguar ish-kryeministri, Sali Berisha. Me anë të një postimi në Facebook, Berisha shkruan se qeveria nga qeveri të popullit është kthyer në qeveri të drogës. Berisha shkruan se ligji për amnistinë fiskale abuzon me çdo gjë të ligjshme dhe amniston çdo gjë të paligjshme.
“Të dashur miq, ajo që duhet të ishte “qeveria e popullit” është bërë “qeveria e çunave”. Në fillim, Damiani u kap në përgjime duke mbledhur “çunat problematik” për të zhvatur zgjedhjet. Tani u thotë “çunave të Londrës” që, sipas tij i kanë bërë paratë me “siklete” (e dini vetë ju…), që të vijnë e t’i legalizojnë në Shqipëri. Kjo është amnistia fiskale e propozuar nga qeveria, që u denoncua si farsë dhe qëllimzezë nga Partia Demokratike, nëpërmjet një rruge të njohur, të çelur nga Rilindja: të abuzojmë me çdo gjë të ligjshme dhe të amnistojmë çdo gjë të paligjshme” – shkruan Berisha në facebook.
Amnistia Fiskale është deklaruar nga qeveria si mundësia për të legalizuar paratë e të gjithë emigrantëve shqiptarë. Shteti u jep mundësinë emigrantëve që të legalizojnë deri në dy milionë euro. Në rastet kur subjektet deklaruese duan t’i transferojnë shumat e deklaruara jashtë vendit para këtij afati, ndaj tyre parashikohet penalitet në masën 30% të shumës së transferuar. Nëse subjektet vendosin t’i investojnë pasuritë e deklaruara në tituj shtetëror, bono thesari apo obligacioni jo më të vogla se 2-vjeçare, Banka e Shqipërisë do të mbajë një tatim prej 5% të shumë totale për investimet e bëra në 4-mujorin e parë prej hyrjes në fuqi të ligjit dhe 7% pas kësaj periudhe kohore.
Discussion about this post