Ministrja e Financave, Delina Ibrahimaj, ka dhënë sot më shumë detaje rreth amnistisë fiskale. Ministrja dha detaje se si do të aplikohet kjo amnisti që parashikon legalizimin e shumës deri në 2 milion euro. Ibrahimaj shpjegoi se në drejtorinë e Tatimeve do të krijohet një zyrë e njësisë fiskale. Kjo njësi do të analizojë të gjitha kërkesat brenda një afati 5 ditor dhe më pas subjektet e kualifikuara do të nisin procedurat me bankat, ku do të paguajnë edhe një normë tatimore.
“Ky projektligj ka një sërë avantazhesh. Ai propozon që ne të diskutojmë dhe analizojmë premisat. Synon të ketë një afat 9 mujor zbatimi. Subjektet janë individë, janë edhe individë rezidentë tatimorë edhe nëse nuk janë shtetas shqiptar. Është parashikuar një kufi prej 2 milion eurosh. Në zbatim të këtij ligji te tatimet do të krijohet një zyrë e njësisë fiskale. Kjo zyrë do të analizojë të gjitha kërkesat që do të vinë nga subjektet. Në përfundim të afatit 5 ditor administrata do të jap një vërtetim nëpërmjet të cilët subjektet do ti drejtohen për të paguar një normë tatimore. Është 7% për katër mujorin parë dhe 10% për të dytin. Në përfundim administrata tatimore do të japë një certifikatë ku do të jenë legalizuar këto para apo asete”, deklaroi ministrja.
Kujtojmë se Banka Botërore, Fondi Monetar Ndërkombëtar dhe disa organizata të tjera ndërkombëtare e kanë kundërshtuar amnistinë fiskale, duke thënë se rrezikon të rrisë më tepër pastrimin e parave dhe nivelin e korrupsionit.
Discussion about this post