Doza e tretë e vaksinës anti-Covid mund të nis brenda këtij muaji, deklarojnë ekspertët.
Anëtarja e Komitetit të Imunizimit, Aida Bushati, u shpreh se doza e tretë është e rëndësishme për të përballuar Covid-19 në dimër dhe veçanërisht për kategoritë më të rrezikuara.
Pas rekomandimeve të nxjerra nga Komiteti i Imunizimit, anëtarja Bushati, njëherësh neurologe në Spitalin Pediatrik, thotë se edhe fëmijët mbi 12 vjeç me sëmundje të tjera duhet ta bëjnë vaksinën anti-Covid. Vetëm Pfizer do të aplikohet te fëmijët, pasi ka studime edhe për këtë kategori.
Gjithashtu, dozat anti-Covid nuk shkaktojnë probleme me vaksinat e tjera të kalendarit. Gjatë aplikimit të dozës së tretë, do të bëhen edhe kombinime vaksinash për të përforcuar mbrojtjen ndaj Covid-19.
Në Shqipëri janë administruar katër lloj vaksinash deri tani për të parandaluar sëmundjen COVID- 19: BioNTech, Pfizer me dy kontrata janar 2021 dhe Qershor 2021 ; CoronaVac ; AstraZeneca dhe Sputnik V. Një sasi prej 200 mijë dozash është arritur përmes donacioneve nga BE dhe shtete mike me Shqipërinë. Kanë mbërritur deri 1 shtator në vend mbi 1.9 milion doza, nga të cilat një milion janë Sinovac-CoronaVac ; 551 mijë janë BionTech Pfizer ; 320 mijë AstraZeneca dhe 50 mijë janë Sputnik V.
Përqindja e popullatës në Shqipëri së vaksinuar me një dozë sot është 44%, ndërkohë që përqindja e popullatës së vaksinuar me dy doza është drejt 36% të popullatës.
