Ankesa që rrëzon fasadën e “Këshillimit Kombëtar” të Ramës në tenderin 39 mln lekësh

Një nga nismat e radhës të kryeministrit, Edi Rama, ajo e “Këshillit Kombëtar”, është një nga shpikjet e radhës ku sipas tij, ka si qëllim marrjen e mendimit të qytetarëve për disa çështje të rëndësisë strategjike të vendit.

Kjo nismë është kthyer në kryefjalë të Ramës në çdo dalje publike të tij. “Këshillimi Kombëtar” përmban 12 pyetje që u drejtohen qytetarëve shqiptarë për çështje të ndryshme, ku ndër to spikasin pyetjet për legalizimin e kanabisit, certifikatat e vaksinimit, për anëtarësimin në Bashkimin Europian dhe për “Ballkanin e Hapur”. Formulari me pyetjet do t’u dërgohet me postë çdo qytetari për ta plotësuar.

Edhe pse një pjesë e mirë e opinionit publik e konsideron si qesharake këtë nismë, pasi janë të vetëdijshëm që Qeveria dhe kryeministri kur vjen puna për vendimmarrje nuk pyet askënd, “Këshillimi Kombëtar” do t’u kushtojë taksave të shqiptarëve në total 25.000.000 lekë të reja, ose 250 milionë lekë të vjetra.

Por si në çdo procedurë të institucioneve që nuk zbatohen rregullat bazë të prokurimit, edhe kjo e “Këshillit Kombëtar” të Ramës, mesa duket me të njëjtën mënyrë do të bëhet. Këtë e vërejmë në një ankesë që ka mbërritur në Entin Kontraktor dhe Komisionit të Prokurimit Publik. Ankesa bëhet për procedurën e hapur nga Agjencia për Dialog dhe Bashkëqeverisje, për ‘blerje dhe printime të materialeve promocionale për Këshillimin Kombëtar’.

Kjo procedurë mban numrin e referencës REF-18441-02-02-2022 dhe ka fondin limit prej 3.905.561 lekë të reja, ose 39 milionë lekë të vjetra. Kompania “STUDIO SERVICES K – SA” sh.p.k, ka marrë pjesë në garë dhe siç duket është skualifikuar padrejtësisht. Për këtë, shoqëria në fjalë i është drejtuar me një ankesë KPP-së, pasi i duket i padrejtë skualifikimi i ofertës së saj.

Por përpos mënyrës së prokurimit, kjo ankesë është një fakt që edhe “Këshilli Kombëtar” i Ramës, nuk bëhet për të marrë mendimin e qytetarëve për vendimet që merr vet Rama, por për të çuar dëm edhe ca miliona lekë të taksave të qytetarëve, pse jo edhe në xhepat e miqve pranë qeverisë.

Gijotina.com