Ish-futbollisti Antonio Kasano, që në karrierën e tij është aktivizuar për skuadra si Bari, Roma, Real Madrid, Sampdoria, Milan, Inter etj. ka dashur të thumbojë në distancë Juventusin, duke parë Europianin që po bën aktualisht bomberi çek, Patrik Shik. Në mikrofonat e “Bobo TV”, ai bëri një krahasim të Shikut me argjentinasin Paulo Dibala:
Patrik është një lojtar me cilësi të jashtëzakonshme. Ka nuhatje për golin si askush tjetër. Në këtë Europian ka treguar më së miri se sa vlen në të vërtetë. Unë pa frikë them se është dy herë më i fortë se Paulo Dibala”. Kasano foli edhe për momentin kur Shik nuk arriti të kalonte me sukses vizitat mjekësore te Juventusi, të cilat sollën dhe dështimin e transferimit të tij te “Zonja e Vjetër”:
“Nëse ju kujtohet, ai ishte në formë të shkëlqyer dhe po e tregonte me golat e shënuar. Unë e mbaj mend sepse kam qenë në një ekip me të. Patriku u ndie totalisht i zhgënjyer pas dështimit të kalimit te Juve, iku më vonë te Roma, por ajo gjë e dëmtoi shumë emocionalisht”.
Antonio Kasano u shpreh në fund se Patrik Shik do të jetë një nga futbollistët më të kërkuar në merkato: “Ky Europian është një vitrinë shumë e mirë për atë. Klubet elitë të Europës do të bëjnë të pamundurën për ta blerë. Unë besoj se do të përmirësohet akoma më shumë, Shik ka ende shumë për të dhënë”.
