Abuzimet e Leli Kajas, administratorit të Eco-ELB, po dalin në dritë edhe në Komisionin e Prokurimit Publik që ka anuluar një prej tenderëve me shkelje. Gijotina.com ka treguar disa herë se si me paratë që mbledh nga buxheti i bashkive të Prefekturës Elbasan për inceneratorin, ECO -ELB po i bën “studime” për landfillin (vendin e grumbullimit të plehrave), “riparime” kaldaje, pra në tendera ku firojnë fondet.
Së fundi bëhet fjalë për tenderin me objekt “ (Për landfillin) Monitorimi i parametrave mjedisore dhe hartimi i raporteve mjedisore” me fond limit 3.000.000 lekë të reja (pa TVSh). Procedura është zhvilluar në datë 10 tetor 2023 nga autoriteti kontraktor, Shoqëria “ECO – ELB” SHA.
Në këtë tender janë shpallur fitues kompaninë ECCAT Environmental Consulting, Chemical Analysis & Testing me pronarë Luan Bahollin dhe Indrit Dajën. Kjo kompani ka paraqitur ofertën 18 milionë lekë. Në 30 tetor 2023 u publikua fituesi dhe në nëntor parashikohej të niste puna që do të zgjasë disa muaj.
Denoncimi
Por, përveç abuzimit me fondin dhe faktit që ky është një projekt i pavend, procedura ka ngecur për shkak se nuk ndalen denoncimet mbi prokurimin. Denoncimi më i fundit është bërë nga firma “Tenuis Laboratories” SHPK, e cila pretendon se fituesi ka qenë i paracaktuar për të dyja lotet e këtij projekti, sepse ka paraqitur të njëjtën ofertë në të dyja rastet pa u përshtatur kritereve specifike për secilën.
“Vihet re se subjekti fitues ka dhënë te njëjtën oferte identike pre te dyja lotet por nga studimi I hollësishëm i parametrave par te dyja lotet vihet re ndryshimi qe kane lotet nga njeri-tjetri. Për procedurën (per impiantin) monitorimi i parametrave mjedisore dhe hartimi i raporteve mjedisore me numer ref-81683-09-28-2023e kemi monitorim ne oxhak dhe parametrat qe kërkohet te maten janë analiza specifike dhe me kosto shume me te larte se matjet ne ajër”, thuhet në ankesë.
Më tutje ankimuesi thekson se “teksa procedura e parë lidhur me këtë projekt ishte në proces ankimi, Eco-ELB hapi garën për një procedurë tjetër, gjë që në fakt nuk është e ligjshme, sidomos kur shohim që është e kategorisë me negocim!”
Jo vetëm kaq, por kontrata me fituesin është firmosur më datë 20 qershor 2023, ndërsa afati ishte deri më datë 22 qershor.
“Gjithashtu dëshirojmë t’ju bëjmë me dije se na janë vene ne dispozicion disa dokumente nga Eko-Elb ku informohemi se ne datën 20.06.2023 është hapur një procedurë me negocim, pa shpallje paraprake te njoftimit te kontratës për monitorim te parametrave mjedisore dhe hartim 5 i raporteve mjedisore me fond limit 750.000 leke pa tvsh. A është e ligjshme kjo, për me tepër kur ndërkohe një procedure tjetër e hapur për ketë objekt ishte ne ankimim?
Për me tepër njoftimi i fituesit është bere ne datën 20.06.23, kontrata është firmosur ne date 21.06.23 dhe kontrata ka patur afat deri ne datën 22.06.23. për fat te keq Eko-Elb nuk na ka vene ne dispozicion raportin e monitorimit, por duket e pa mundur qe monitorimi, analizimi, përgatitja e raportimit te jene mbyllur brenda afatit te kontratës, date 22.06.23”, thekson ankimuesi.
Vendimi
Por, pavarësisht këtyre detajeve, Komisioni i Prokurimeve Publike ka vendosur të mos pranojë ankesën e operatorit ekonomik “Tenuis Laboratories” SHPK. Ndërsa më poshtë thotë se është pranuar pjesërisht ankesa operatorit ekonomik “Qendra e Monitorimit të Mjedisit” SHPK, për procedurën e mësipërme të prokurimit.
Qendra e Monitorimit të Mjedisit ishte e para që denoncoi këtë tender dhe është bërë publike nga Gijotina.com më datë 29 dhjetor 2023. Qendra e Monitorimit të Mjedisit” SHPK ka paraqitur një ankesë në Komisionin e Prokurimeve Publike, ku konstaton se fituesi nuk përmbush kriteret e vendosura në tender.
Pasi ka bërë shqyrtimet, KPP ka evidentuar disa mangësi, ku një prej tyre është mungesa e një dokumenti, pa të cilin operatorët nuk mund të marrin përsipër të zhvillojnë këtë projekt.
Pra në atë pikë KPP e ka pranuar që ka mangësi dhe anashkalime në kontratën e firmosur mes Eco-Elb dhe firmës fituese. Në pikën 3 të vendimit të zbardhur thuhet : “Autoriteti kontraktues të anulojë procedurën…”.
Theksojmë se Lali Kaja gjatë detyrave të tjera si drejtor në Bashkinë e Elbasanit është kapur nga KLSH me shkelje me dëme të financiare shkaktuar buxhetit. Po ashtu emri i tij është denoncuar në prokurori për shkeljet e kryera. Tani që administron inceneratorin po tregon sërish mungesë frike ndaj SPAK-ut që e ka nën sekuestro objektin.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post