Ankimuan masën e sigurisë, Apeli i GJKKO lë në burg Ergys Agasin dhe Uljan Shpatarakun -

Gjykata e Posaçme e Apelit për Korrupsionin dhe Krimin e Organizuar la në fuqi vendimin e Gjykatës së Posaçme të Shkallës së Parë lidhur me masat e sigurimit ndaj personit nën hetim Ergys Agasi dhe Uljan Shpararaku, i arrestuar si shofer i Ergys Agasi.

Vendimi është marrë sot, më 22 shtator 2026, nga trupi gjykues monokratik i përbërë nga gjyqtari Florjan Kalaja, pas shqyrtimit të ankimit të Agasit ndaj vendimit të GJKKO-së së Shkallës së Parë.

Vendimi:

Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtar z. Florjan Kalaja, sot më datë 22.09.2026, disponoi për çështjen penale nr. 43 akti, datë 17.09.2026 regjistrimi, mbi ankimin e personit nën hetim/ankues E.A, në lëndë të masave të sigurimit, si vijon:

– Miratimin e vendimit nr. 62, datë 28.08.2026 të Gjykatës së Posaçme të Shkallës së Parë për Korrupsionin dhe Krimin e Organizuar.

– Në bazë dhe për zbatimin të nenit 103 të K.Pr.Penale ndalohet publikimi i vendimit deri në mbylljen e hetimeve paraprake.

– Kundër këtij vendimi mund të bëhet rekurs në Gjykatën e Lartë brenda 45 ditëve duke nisur ky afat nga e nesërmja e njoftimit të vendimit të arsyetuar.
U shpall në Tiranë, më datë 22.09.2026.

Agasi u arrestua më 26 gusht, pas më shumë se tetë muajsh në kërkim. Ai kërkohej që prej dhjetorit 2025, kur Gjykata e Posaçme kishte caktuar ndaj tij masën “arrest në burg” në kuadër të hetimeve të SPAK për dosjen e AKSHI-t. Gjatë operacionit të zhvilluar në atë kohë, kontrollet në ambientet e lidhura me të nuk çuan në kapjen e tij.

Për muaj me radhë pati pikëpyetje nëse Agasi ishte larguar jashtë Shqipërisë apo vazhdonte të fshihej brenda vendit. Elbasani ishte një nga zonat që u përmend vazhdimisht, ndërsa zhvillimet që çuan në arrestimin e tij forcuan pikërisht pistën e qëndrimit brenda territorit shqiptar.

SPAK bëri të ditur pas arrestimit se BKH dhe strukturat e specializuara të Policisë kishin punuar prej disa javësh për lokalizimin e tij. Agasi u identifikua në Elbasan dhe më 26 gusht u nis me automjet në drejtim të Durrësit.

Forcat e angazhuara në operacion e ndoqën lëvizjen e tij, ndërsa ndërhyrja për arrestimin u krye në hyrjen jugore të Durrësit, në zonën e Plepave. Në automjet Agasi ishte pasagjer, ndërsa drejtues ishte ish-punonjësi i Policisë Uljan Shpataraku, i cili u arrestua në flagrancë për “përkrahje të autorit të krimit”.

Prokuroria e Posaçme ka ngritur ndaj tij disa akuza, që lidhen mes të tjerash me grupin e strukturuar kriminal, shkeljen e barazisë në tendera, konkurrencën e paligjshme dhe pastrimin e produkteve të veprës penale.