Kreu demokrat Sali Berisha tha mbrëmjen e sotme në emisionin “Open” se dhëndri i tij Jamarbër Malltezi u arrestua në mënyrën më të turpshme vetëm për hakmarrje politike.
Berisha tha se gjyqtarja e Apelit të GJKKO duhej të lironte në sallën e gjyqit Malltezin, ndërsa tha se ai nuk u pyet asnjëherë në 3 vite hetime shteruese, sikundër thuhet në vendimin e Gjykatës, janë kryer nga SPAK.
“Kam atakuar gjykatësen Irena Gjoka sepse ajo në konflikt të pastër interesi ka marrë nën hetim Sali Berishën, ndërkohë që unë e kam shkarkuar atë nga detyra. Ajo u shkarkua nga KLD me firmën time, ndërkohë që gjyqtarja e fshehu me ditë të tëra këtë fakt”, tha Berisha.
Ish-Kryeministri deklaroi se ajo jo vetëm nuk dha dorëheqjen, por më caktoi një enveriste si avokate kryesisht.
Berisha tha se gjyqtarja e Apelit, Ilirjana Olldashi, nuk ka guxuar të prekë masat ndaj meje, duke shtuar se masat ndaj tij nuk ekzistojnë përsa kohë nuk ka një autorizim nga Kuvendi për vendosjen e masave të sigurisë ndaj një deputeti.
“Kushtetuta në nenin 73, pika 2, përcakton se deputetit nuk mund t’I hiqet liria në asnjë lloj forme, nuk mund t’I kontrollohet banesa dhe nuk mund të arrestohet. Ky është neni që unë në vitin 2012 kërkova që ta hiqnim, por Edi Rama nuk e pranoi në atë kohë, ndërkohë që shkonte i thoshte ambasadorëve që nëse hiqet ky nen Sali Berisha më arreston”, tha ish-Kryeministri.
Ai tha se vendimi i GJKKO është standardi që Edi Rama përcakton ndaj kundërshtarit. “Keni rastet e Alqi Bllakos, Saimir Tahirit, kur iu referuan nenit 73 të Kushtetutës. Ndërsa në rastin e Sali Berishës ky nen nuk u zbatua, pse? Sepse Edi Rama ka standardin e tij për kundërshtarët politikë”, tha Berisha. Ai u shpreh se ndaj gjyqtares Irena Gjoka duhej të niste procedimi penal.
Discussion about this post