Franca ka marrë një lajm të keq para çerekfinales së Kupës së Botës ndaj Marokut.
FIFA ka refuzuar kërkesën e Federatës Franceze të Futbollit për anulimin e kartonit të verdhë të Michael Olise, duke lënë në fuqi ndëshkimin e sulmuesit.
Trajneri Didier Deschamps konfirmoi se federata kishte apeluar kartonin që Olise mori në fund të ndeshjes së 1/8 së finales kundër Paraguait, pas një dueli me Matias Galarzan.
Megjithatë, FIFA nuk e ndryshoi vendimin.
“Kartoni i verdhë nuk ka ndryshuar. Këtë mëngjes morëm njoftimin nga FIFA”, deklaroi Deschamps në konferencën për shtyp.
Vendimi ka shkaktuar pakënaqësi në kampin francez, pasi vjen vetëm pak ditë pasi FIFA pezulloi dënimin me karton të kuq të amerikanit Folarin Balogun, duke i mundësuar atij të luante në ndeshjen ndaj Belgjikës.
Olise ka qenë një nga lojtarët më të spikatur të Francës në këtë Botëror, duke luajtur në çdo takim dhe duke regjistruar pesë asistime.
Tashmë ai do të duhet të tregojë kujdes maksimal ndaj Marokut, pasi një tjetër karton i verdhë do ta linte jashtë një gjysmëfinaleje të mundshme.
Deschamps, ndërkohë, u bëri thirrje lojtarëve të tij të mos e nënvlerësojnë Marokun, duke e cilësuar skuadrën afrikane si një kundërshtar me shumë cilësi dhe të aftë për të vënë në vështirësi çdo ekip.
Discussion about this post