Samiti i NATO-s në Ankara u mbyll nën hijen e deklaratave të forta të presidentit amerikan Donald Trump, i cili fillimisht kërcënoi me ndërprerjen e marrëdhënieve tregtare me Spanjën, përpara se të ndryshonte qëndrim dhe të fliste për “unitet” brenda aleancës.
Gjatë fjalës së tij, Trump e quajti Spanjën një “partner të tmerrshëm” në NATO dhe kritikoi aleatët për qëndrimin e tyre ndaj konfliktit me Iranin. Ai madje deklaroi se kishte urdhëruar Sekretarin e Thesarit, Scott Bessent, të ndalonte tregtinë me Madridin.
Megjithatë, vetëm pak orë më vonë, presidenti amerikan zbuti tonet, duke thënë se Spanja kishte plotësuar kërkesat e SHBA-së dhe se në samit kishte mbizotëruar një atmosferë e fortë bashkëpunimi.
“Sot në atë sallë kishte shumë unitet. NATO-ja ishte vërtet e jashtëzakonshme”, deklaroi Trump.
Një tjetër moment i rëndësishëm ishte takimi me presidentin ukrainas Volodymyr Zelensky, ku Trump u shfaq shumë më miqësor se në përballjet e mëparshme.
Ai njoftoi se SHBA-ja do t’i japë Ukrainës licencën për të prodhuar sistemet raketore “Patriot”, një lëvizje që synon të forcojë mbrojtjen ajrore të Kievit përballë sulmeve ruse.
Në përfundim të samitit, vendet anëtare të NATO-s riafirmuan angazhimin për mbrojtjen kolektive sipas Nenit 5 të aleancës dhe miratuan një paketë prej 70 miliardë eurosh ndihmë ushtarake për Ukrainën gjatë vitit 2026.
Nga ana tjetër, presidenti turk Recep Tayyip Erdogan deklaroi se Turqia është e gatshme të marrë një rol më të madh në ndarjen e përgjegjësive brenda NATO-s, duke vlerësuar se samiti në Ankara hodhi bazat për një aleancë edhe më të fortë në vitet e ardhshme.
Discussion about this post