Apple po planifikon të nisë shitjen e pjesëve për iPhone dhe do të ofrojë instruksione për riparimin e pajisjeve të Apple nga shtëpia, pa patur nevojën për t’i dërguar ato në një dyqan riparimi.
Shitja e pjesëve do të bëhet fillimisht për iPhone 12 dhe 13, e më pas do të ndiqet nga Macs me procesor M1. Tashmë ju do të keni mundësinë të ndërroni ekranin, baterinë ose kamerën duke përdorur pjesët origjinale nga Apple.
Ky është një hap i madh për kompaninë, e cila historikisht ka qenë tepër rezistente ndaj të drejtës së riparimit. Gjatë kësaj jave Apple deklaroi gjithashtu se nuk do të çaktivizojë Face ID në pajisjet që ndërrojnë ekranin nga shtëpia e tyre.
Ky program do të quhet “Self Service Repair” dhe do të lançohet në fillim të vitit të ardhshëm në SHBA dhe do të përhapet në vende të ndryshme në botë. Kompania tregon se ky program është vetëm për “teknikët individual me njohuri dhe eksperiencë në riparimin e pajisjeve elektronike”, dhe se shumica e përdoruesve duhet t’i drejtohen një dyqani riparimi.
Apple thotë se ka në plan të shesë më tepër se 200 pjesë individuale dhe mjete për riparimin e iPhone-ve nga shtëpia.
Discussion about this post