Renato Arapi është pasuesi i Edi Martinit në stolin e skuadrës së Teutës. Ish-futbollisti dhe kapiteni i durrsakëve ka marrë një përgjegjësi të madhe teksa në prezantimin e tij para mediave foli për këtë mundësi dhe këshillat nga presidenti Edmond Hasanbelliu.
“Më erdhi pak surprizë se nuk e kisha menduar, por është përgjegjësi. Falenderoj presidentin për besimin, është përgjegjësi se ekipi vjen nga titulli dhe në katër ndeshjet e fundit rezultatet nuk kanë qenë të duhurat, pavarësisht lojës. Shpresoj të ndryshoj pak gjëra se nuk ka edhe shumë kohë, shpresoj t’i marrim maksimumin ndeshjes së radhës.
Është një plus që shumë lojtarë i kam pasur shokë skuadre, i njoh lojtarët edhe nga këmba por edhe nga koka. Jam i bindur se edhe ata do të më suportojnë. Koha është e shkurtër, por ajo që do të synoj këtë javë është ana psikologjike për t’i rikthyer besimin.
Kemi bërë ndeshje të mira, edhe me Partizanin në fund kapitulluan, por vjen nga lodhja. Ka diferencë pikësh se jemi tetë pikë mbrapa vendit të parë, por edhe nga kampionati i vjetshëm ishim 11 pikë mbrapa dhe fituam. Është e vështirë, por me kontigjentin që kemi do të provojmë se ekipi është ndërtuar për të fituar.
Ndeshjet jashtë fushe? Ky është një problem më vete dhe e dinim. Është një minus, por në Elbasan kanë qenë ndeshje të mira. Është ndeshja e parë që jemi mundur aty dhe nuk do të përbëjë problem.
Kartonat e shumtë? Është një porosi edhe nga presidenti sepse shumë kartona janë marrë për protesta dhe një ekipi kampion nuk i shkon për shtat. Pastaj kartonat janë në lidhje me lojën, kemi lojtarë në mesfushë agresivë dhe është e pritshme.
Ekipi është ndërtuar për vendet e para, pavarësisht se deri në këtë moment gjërat nuk shkuan siç e prisnim. Por, duke shtuar vetëbesimin do të jemi në vendet e para. Por ka ekipe që kanë investuar, mos të harrojmë Dinamon apo edhe Egnatian”, u shpreh Arapi.
Discussion about this post