Kampionati shqiptar nuk ka nisur ende mirë dhe skandalet e arbitrave kanë dalë menjëherë në pah, duke hedhur baltë mbi një garë që në letër duhej të ishte e pastër dhe e ndershme. Rasti i ndeshjes mes Egnatias dhe Elbasanit është shembulli më i qartë se si arbitrat dhe VAR-i, në vend që të zbatojnë rregulloren, shpikin vendime që shkatërrojnë futbollin dhe rrezikojnë të varrosin besueshmërinë e kampionatit.
Në minutat e fundit të shtesës, kur Elbasani kishte shansin të barazonte, ndodhi momenti i kaosit. Loukili gjuajti, Dajsinani e ndali topin, por Lajthia ishte aty për ta shtyrë në rrjetë. Gëzimi i verdhebluve zgjati vetëm pak sekonda: arbitri kryesor Cjapi, i ndikuar nga VAR-i, anuloi golin duke akorduar goditje dënimi në favor të Egnatias. Arsyeja? Lajthia, sipas tyre, kishte hyrë në zonë para kohe.
Por këtu fillon absurdi. Në pamjet filmike shihet qartë se jo vetëm Lajthia, por edhe Ruçi i Egnatias kishte hyrë brenda zonës në të njëjtën kohë. Pra, në bazë të Nenit 14 të IFAB, arbitri nuk duhej të anulonte golin, por të urdhëronte ripërsëritje të penalltisë. Ky është një rregull elementar i futbollit, që çdo gjyqtar duhet ta dijë. Por në Shqipëri, mesa duket, rregullat interpretohen sipas qejfit, sipas interesit dhe shpesh me dy standarde.
Ky vendim është më shumë sesa një gabim teknik: është një turp, një njollë që rrezikon të njollosë gjithë garën që në start. Çfarë besimi mund të kenë tifozët dhe skuadrat kur arbitrat bëjnë “lojën e tyre” dhe VAR-i, që u prezantua si shpëtimtar i futbollit, kthehet në makth për ekipet? Çfarë garancie ka që ky kampionat do të jetë i pastër kur drejtësia në fushë sakatohet që në javën e parë?
Futbolli shqiptar prej kohësh është i akuzuar për manipulime, presione dhe ndërhyrje, por vendime si ky vetëm sa e bëjnë edhe më qesharak dhe e largojnë edhe më shumë publikun nga stadiumet. Në vend që të zbatojnë ligjin e lojës, arbitrat preferojnë të bëhen protagonistë të shëmtuar.
Discussion about this post