FIFA cakton “gjeneralin” slloven për finalen, kush është arbitri që do të vërë drejtësi në Spanjë-Argjentinë

FIFA ka përzgjedhur arbitrin slloven Slavko Vinčić për të drejtuar finalen e Kupës së Botës 2026 mes Spanjës dhe Argjentinës, e cila do të zhvillohet të dielën në stadiumin MetLife në New Jersey. Emërimi i tij shënon një moment historik për futbollin slloven, pasi Vinčić bëhet arbitri i parë nga Sllovenia që gjykon finalen e një Kampionati Botëror.

Në një video të publikuar nga FIFA, 46-vjeçari shfaqet dukshëm i emocionuar në momentin kur merr lajmin se do të jetë arbitri kryesor i ndeshjes më të rëndësishme të futbollit botëror.

Kjo është pjesëmarrja e dytë e Vinčić në një Kupë Bote për meshkuj. Pas dy ndeshjeve që gjykoi në Katar 2022, ai ka qenë një nga arbitrat më të angazhuar edhe në edicionin 2026, ku ka drejtuar disa takime, përfshirë sfidën me eliminim direkt mes Meksikës dhe Ekuadorit.

Finalja mes Spanjës dhe Argjentinës nuk do të jetë ndeshja e parë për një trofe të madh në karrierën e tij. Në vitin 2024, UEFA i besoi drejtimin e finales së Ligës së Kampionëve në stadiumin “Wembley”, ku Real Madridi mposhti Borussia Dortmundin me rezultatin 2-0. Më herët, ai kishte gjykuar edhe finalen e Ligës së Europës në vitin 2022.

Në finalen e Botërorit, Vinčić do të asistohet nga bashkëkombësit Tomaž Klančnik dhe Andraž Kovačič, ndërsa arbitër i katërt është caktuar jordanezi Adham Makhadmeh.

Arbitër që nuk i nxjerr lehtë kartonët

Statistikat tregojnë se Vinçiç nuk është një arbitër që ndëshkon lehtë. Në ndeshjet e Botërorit dhe Kampionatit Evropian ai ka mesatarisht 3.3 kartonë të verdhë për ndeshje, ndërsa vetëm në Kupën e Botës mesatarja zbret në 3 kartonë për takim, më pak se mesatarja prej 3.55 kartonësh për ndeshje në Botërorin e Katarit 2022.

Megjithatë, ai është kritikuar së fundmi për një vendim në çerekfinalen e Champions League mes Bayernit dhe Real Madridit. Vinçiç përjashtoi Eduardo Camavingan me kartonin e dytë të verdhë, pasi francezi pengoi një goditje dënimi të shpejtë.

Vendimi u konsiderua i diskutueshëm nga shumë analistë. Ish-arbitri i FIFA-s, Eduardo Iturralde González, deklaroi se, edhe pse rregullorja e lejonte ndëshkimin, arbitri duhej të kishte përdorur më shumë logjikë.

“Në këtë nivel nuk mund ta lësh një skuadër me dhjetë lojtarë për një episod të tillë”, u shpreh ai.