Një lajm fantastik vjen nga Amerika Latine (fantastik kryesisht për tifozët e Italisë por edhe të futbollit të drejtë).
Byron Moreno është një nga emrat që në Apenine nuk e harrojnë kurrë. Ish-arbitri ekuadorian bëri “famë” në ndeshjen e Kupës së Botës në vitin 2002, kur në sfidën mes Koresë së Jugut dhe Italisë i mohoi axurrëve kualifikimin për në çerekfinale teksa me gjykimin e tij favorizoi aziatikët.
Së fundmi, “idioti” 53-vjeçar, pasi u arrestua para më shumë se një dekade për transport ndërkombëtar droge në New York, është rikthyer në vëmendje teksa arbitronte një ndeshje të një turneu amator në vendlindjen e tij.
Nga video e cila është bërë virale, shihet se si një prej futbollistëve e shtyn nga pas Morenon duke e përplasur në tokë.
Ish-arbitri ngrihet menjëherë dhe nuk reagon ndërsa lojtarët e tjerë i afrohen për ta kontrolluar nëse gjithçka ishte në rregull. Kështu, edhe pse kishte “humbur” prej kohësh, Moreno mesa duket e gjen gjithnjë mënyrën për t’u bërë protagonist.
Discussion about this post