Dy nga sfidat më të vështira i ndajnë Argjentinën dhe Anglinë nga një përballje që do të zgjonte kujtimet e një prej rivaliteteve më të mëdha në historinë e futbollit. Plot 40 vjet pas ndeshjes legjendare të vitit 1986, argjentinasit ëndërrojnë një tjetër duel me “Tre Luanët”, këtë herë në gjysmëfinalen e Botërorit 2026.
Më 22 qershor 1986, në stadiumin “Azteca”, Diego Armando Maradona shkroi historinë me dy golat e tij kundër Anglisë në çerekfinale. Fillimisht shënoi me të famshmen “Dora e Zotit”, ndërsa pak minuta më vonë realizoi atë që konsiderohet ende “goli i shekullit”, duke dribluar disa kundërshtarë para se ta dërgonte topin në rrjetë.
Tashmë, katër dekada më vonë, në Argjentinë dhe Angli flitet për mundësinë e një tjetër kapitulli të këtij rivaliteti historik. Megjithatë, të dyja skuadrat duhet të kalojnë fillimisht pengesat e çerekfinaleve.
Argjentina do të përballet me Zvicrën, ndërsa Anglia do të sfidojë Norvegjinë. Vetëm nëse të dyja fitojnë, do të takohen në gjysmëfinalen e planifikuar për më 15 korrik në stadiumin e Atlantës, ku do të luhet për një biletë në finalen e Botërorit.
Skuadra e Lionel Scalonit ka vuajtur në fazat e fundit të turneut, duke kaluar me vështirësi Kepin e Gjelbër dhe Egjiptin, ndërsa tani e pret një kundërshtar edhe më i fortë si Zvicra. Nga ana tjetër, Anglia, një prej favoriteve për titull, do të ketë përballë Norvegjinë e Erling Haalandit.
Pas ndeshjes së famshme të vitit 1986, Argjentina dhe Anglia janë përballur vetëm dy herë në kompeticione zyrtare. Argjentinasit triumfuan me penallti në Botërorin e vitit 1998, ndërsa anglezët fituan 1-0 në fazën e grupeve të Botërorit 2002.
Rivaliteti mes dy vendeve shkon përtej futbollit dhe lidhet edhe me konfliktin historik për Ishujt Falkland, të njohur në Argjentinë si Ishujt Malvinas. Për këtë arsye, një gjysmëfinale mes dy kombëtareve do të kishte një ngarkesë të jashtëzakonshme emocionale dhe historike, duke rikthyer në skenë një nga përballjet më ikonike të Kupës së Botës.
Discussion about this post