Kreu i FSHF Armand Duka i ftuar në ABC News nga gazetari Arian Çani foli për hapjen e basteve sportive në vend. Duka tha se shumicën e të ardhurave nga bastet duhet t’i fitojë sporti.
“Duhet pranuar që njerëzit gjithmonë kanë luajtur baste dhe do të luajnë, sado që të përpiqemi që të ndalojmë këtë fenomen. Një pjesë të parave që vihen në baste, që do të hapen së shpejti, duhet të shkojnë për sportin. Të caktohet një VKM, të përcaktohet me ligj edhe përqindja e fitimeve sesa para merr sporti. Të krijohet tregu i sportit në vend, Shqipëria meriton më tepër”, tha Duka.
Armand Duka nënvizoi se duhet paketë e plotë ligjore për bastet.
“Ka ardhur koha që të punojmë së bashku për të miratuar një paketë të plotë ligjore dhe fiskale e cila do të krijonte tregun e futbollit dhe sportit në Shqipëri. Duhet ta fillojmë me Ligjin e Sponsorizimit. Ekonomia shqiptare do të ishte përfituesja më e madhe e krijimit të këtij tregu.
Të rinjtë dhe të rejat e këtij vendi do të kenë gjithashtu kushte dhe mundësi më të mira për të ngritur lart flamurin e vendit tonë të dashur. Duke punuar së bashku, pushtet qendror, pushtet lokal, organizata sportive dhe biznesi, jam shumë i sigurt se do të shkojmë larg dhe do të shkruajmë një faqe të ndritur në histori. Të ardhurat e siguruara nga bastet sportive janë gjithashtu një mekanizëm që mund të ndihmojë buxhetin e sportit shqiptar”, tha Duka mes të tjerash.
Discussion about this post