18-vjetori i Pavarësisë së Kosovës festohet kudo. Një ditë e veçantë për të gjithë shqiptarë anembanë botës.
E padiskutim nuk kishte si të mungonte edhe një urim special për 17 shkurtin nga Armand Duka. Kreu i Federatës Shqiptare të Futbollit nëpërmjet një postimi në rrjetet sociale ka uruar 18-vjetorin e Kosovës si shtet i lirë, ndërsa ka postuar një foto me Agim Ademin, presidentin e Federatës së Futbollit të Kosovës.
“Për ata që besuan me zemër, për ata që sakrifikuan me shpirt, dhe për Kosovën që sot jeton e lirë.
Me këtë foto nga një moment i veçantë me mikun tim Agim Ademi, i uroj të gjithë shqiptarëve festën e Pavarësisë së Kosovës”, ka shkruar Duka.
Edhe Federata e Futbollit uroi të gjithë shqiptarët e Kosovës kudo ku jetojnë e veprojnë festën e 18-vjetorit të Pavarësisë.
Gjatë këtyre 18 viteve, Kosova ka përjetuar zhvillim të dukshëm në shumë fusha, ndërsa sporti, dhe në veçanti futbolli, ka luajtur një rol të rëndësishëm në përfaqësimin dhe promovimin e saj në arenën ndërkombëtare.
FSHF vlerëson në mënyrë të veçantë bashkëpunimin e ngushtë dhe marrëdhëniet vëllazërore me FFK, të ndërtuara mbi respekt të ndërsjellë, solidaritet dhe synime të përbashkëta për zhvillimin dhe promovimin e futbollit.
Në këtë përvjetor të rëndësishëm, Federata e Futbollit shpreh bindjen se bashkëpunimi mes dy federatave do të vijojë të forcohet edhe më tej, në shërbim të brezave të rinj dhe të sukseseve të reja sportive.
Gëzuar 18-vjetorin e Pavarësisë Kosovë!
View this post on Instagram
Discussion about this post