Ish-sulmuesi i Kombëtares Shqiptare, Armando Sadiku, është zyrtarisht lojtari më i ri i Belinzonës në Zvicër, një ekip që garon në kategorinë e dytë. Lajmi u konfirmua nga vetë klubi zviceran.
34-vjeçari Sadiku, i cili më parë u përfol për një rikthim të mundshëm te Elbasani në Superiore, nuk arriti të konkretizojë këtë lëvizje, duke zgjedhur të vazhdojë kontributin e tij jashtë Shqipërisë.
Klubi Belinzona e mirëpriti Sadikun me një njoftim zyrtar, duke theksuar përvojën dhe karizmën e tij:
“Armando Sadiku është lojtari i ri i Belinzonës. Belinzona ka kënaqësinë të mirëpresë një sulmues të vërtetë me përvojë ndërkombëtare: Armando Sadiku. I lindur në vitin 1991, sulmuesi shqiptar me një karrierë të pasur dhe të respektuar ka veshur fanellat e klubeve të njohura si Zyrih, Lugano, Legia Varshavës dhe Levante.”
Njoftimi vijon duke vënë në pah arritjet e tij: “Ai ka luajtur në kampionatet e Superligës, Ekstraklasa, La Liga dhe në liga të tjera europiane, duke sjellë me vete eksperiencë, karizëm dhe më shumë se 30 ndeshje me Kombëtaren shqiptare, për të cilën ka shënuar në fazën e grupeve të Euro 2016, me një gol historik kundër Rumanisë. Fuqia fizike, instinkti i golit dhe mentaliteti fitues janë tashmë në shërbim të sulmit të skuadrës. Me të, Belinzona synon më lart. Mirë se erdhe në Belinzona, Armando!”
Discussion about this post