Armando Subashi, kryetari i Bashkisë Fier, ka nisur një aferë me “Flamur të kuq” me Yzedin Bozhajn, biznesmenin që shpesh përfiton nga korrupsioni i zyrtarëve të tenderëve. Kryebashkiaku ka shfrytëzuar projektin e rikonstruksionit të shkollës “Naim Frashëri për të kënaqur Bozhajn. Bëhet fjalë për shkollën në foton më poshtë, e cila është objekt ekzistues në gjendje shumë të mirë, që me pak lekë mund të mirëmbahet.
Qëllimi i Subashit është nxjerrë përfitim nga ky projekt. Dhe hapin e parë e ka bërë përmes kontratës abuzive që ka firmosur më datë 1 shtator 2023. Bëhet fjalë për tenderin me objekt “Rikonstruksioni i shkollës 9 -vjeçare “Naim Frasheri”, për të cilën është lënë në dispozicion fondi limit me vlerë 530 milionë lekë.
Është një fond i konsiderueshëm që Subashi e ka çuar tek fituesi i paracaktuar. Konkretisht, nga 10 oferta që u paraqiten për këtë tender, 9 prej tyre u përjashtuan nga gara që në fazën e parë. Në dokumentet e tenderit duket qartë se u favorizua dhe u klasifikua si e vlefshme për në fazën e fundit vetëm oferta e firmës “Shendelli” SHPK. Ajo u shpall automatikisht fituese pa garë dhe në mungesë të konkurrencës.
Duhet të theksojmë të paktën firma “NIKA” kishte ofertë më të ulët dhe kriteret i plotësonte, por me sa duket Subashi as nuk i ka marrë në shqyrtim kompanitë e tjera. Krybashkiaku shpalli fituese kompaninë e Yzedin Bozhajt.
Më tutje shohim se këto lekë “Shendelli” SHPK do t’i përvetësojë për 4 muaj punime që do të kryejë në shkollë. Në dokumentet standarde të tenderit tregohet që do të bëhet heqja e suvave dhe risuvatim i godinës, gjithashtu do të ndërrohen dhe dritaret e dyert. Me pak fjalë për fasadën e kësaj shkolle Bozhaj fut më shumë se gjysmë miliard lekë në xhiron e tij.
Bozhaj, lubi e fondeve shtetërore
Yzedin Bozhajt është pronari i firmës SHËNDELLI SHPK, që ka përfituar në të gjithë sektorët ku derdhen paratë publike. Firma e tij është ndër kompanitë që përfitojnë më shumë nga bashkia e Tiranës.
Kjo kompani ka marrë fonde prokurimesh publike me vlerë mbi 8.7 Miliard Lekë nga bashkitë e Shqipërisë, ku ka bashkëpunuar me disa nga subjektet e oligarkëve të ndërtimit. 3.8 Miliardë Lekë janë marrë vetën për 2 tenderë në sektorin e Shëndetësisë.
Në sektorin e Ndërmarrjeve Publike është fitues i dy tenderëve në bashkëpunim me NGRACAN 1934 për një tender me vlerë 242 Milionë Lekë dhe me LTE Construction në një procedurë me vlerë 245 Milionë Lekë. Përsa i përket parave nga FSHZH, Bozhaj ka përfituar dy kontrata të mëdha me vlerë mbi 7.7 Miliard Lekë (pa Tvsh).
Ndërkohë, në të dhënat për transfertat nga Thesari i Shtetit tregohet se kjo kompani ka marrë mbi 23 miliardë lekë përfitime për katër vitet e fundit.
Subashi dhe Bozhaj mirë që po shpërdorojnë miliona lekë investime që duhej të shkonin në dobi të nxënësve në Fier, por të paktën t’i kishin kryer punimet e “Naim Frashërit” gjatë sezonit veror, jo tani që nisi viti shkollor.
Lexo edhe: Subashi tallet me paratë e kamionëve për plehrat, fiton “Flamurin e kuq” për korrupsion
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post