Partizani i këtij sezoni ndoshta nuk është më i fortë se vjet, por e sigurt është se kjo skuadër është më dinake dhe racionale. Djemtë e Xhovani Kolelës kanë grumbulluar 19 pikë në 9 ndeshje. Ishin një pikë larg, por duke i parë bardheblutë nga rehatia e divanit, e panë veten 4 pikë para rivalëve më të afërt.
Kjo fazë e parë duket se i ka dhënë këtij ekipi vrullin e duhur dhe duke nisur që nga ndeshja e së dielës ndaj Egnatias, të kuqtë nisin misionin për “vrasjen” e garës dhe për të treguar se mund ta bëjnë këtë, ka disa arsye.
QETËSIA E PIKËVE – Të jesh 4 pikë larg Tiranës do të thotë se ke qetësinë e garantuar se edhe një hap fals nuk të ul nga kreu. Jo vetëm kaq, por fakti që një hap fals e zbret shumë poshtë skuadrën bardheblu, bën që skuadrës së Shehit t’u rritet “tensioni”.
STABILITETI – Të kuqtë kanë grumbulluar 19 pikë pas 9 ndeshjesh, një më pak se Tirana, kampione e vjetshme. Nëse vazhdon me këtë ecuri, skuadra e Kolelës në fund do ta mbyllte sezonin me 76 pikë, më se të mjaftueshme për të fituar titullin.
REAGIMI – Partizani i këtij sezoni ka treguar se di të ngrihet edhe pas një humbjeje shumë të dhimbshme në derbi, por edhe pas një barazimi zhgënjyes ndaj Kastriotit. Ky fakt tregon se të kuqtë ofrojnë garancinë se edhe nëse do të rrëshqasin në ndonjë kthesë, kanë aftësinë të kthehen sërish në rrugën e duhur.
LOJA – Skuadrën e Kolelës nuk ka arritur ta dominojë asnjë kundërshtar në këtë sezon, pavarësisht se Tirana dhe e kanë mposhtur. Fakti që të kuqtë imponojnë gjithmonë lojën, i jep më shumë shanse që ndeshja të shkojë në rrjedhën që ata dëshirojnë dhe këtë e tregon fakti që ata janë në krye, të shkëputur 4 pikë nga ndjekësit më të afërt.
INFERMIERIA BOSH – Pavarësisht se e nisën shumë keq për sa i përket lëndimeve në javët e para, infermieria e Partizanit më në fund duket se ka rënë në qetësi. Aktualisht i vetmi me probleme fizike është Mensah, i cili mund të jetë gati që me Egnatian në fundjavë. Fakti se skuadra e ka kaluar “ferrin” e dëmtimeve, jep më shumë garanci për javët në vazhdim dhe i ofron Kolelës luksin të menaxhojë dhe të kursejë herë pas herë lojtarët titullarë gjatë ndeshjeve./Panorama/
Discussion about this post