Një 21-vjeçar shqiptar është arrestuar nga autoritetet italiane në provincën e Padovës, pasi dyshohet se ishte pjesë e një rrjeti të trafikut të kokainës.
Operacioni i karabinierëve çoi në sekuestrimin e qindra dozave të drogës dhe mijëra eurove që dyshohet se ishin përfituar nga aktiviteti kriminal.
Sipas mediave italiane, i riu, banues në provincën e Breshias dhe i skeduar më parë nga policia, u vu nën vëzhgim pas informacioneve të marra nga hetuesit. Karabinierët organizuan postblloqe dhe monitoruan një automjet me qira që ai përdorte.
Arrestimi u bë në rrugën “Via Principe Amedeo” në Este, ku 21-vjeçari u kap në flagrancë duke i shitur një dozë kokaine një 31-vjeçari italian.
Gjatë kontrollit të automjetit, policia gjeti edhe 12 doza të tjera të gatshme për shitje, si dhe një shumë parash.
Hetimet vijuan me kontrollin e dhomës ku shqiptari kishte qëndruar në Sant’Elena.
Falë nuhatjes së qenve antidrogë, policia zbuloi rreth 360 doza kokaine të paketuara për treg, si dhe 3,365 euro, të cilat dyshohet se ishin fitime nga shitja e lëndëve narkotike.
Pas përfundimit të operacionit, i riu u arrestua me urdhër të Prokurorisë dhe u transferua në burgun e Rovigos, ndërsa hetimet për zbardhjen e plotë të aktivitetit të tij kriminal vijojnë.
Discussion about this post