Deputetja e Partisë Demokratike, Jorida Tabaku, theksoi se në mbledhjen e sotme të Këshillit të Mandateve, që do të vendoste për kërkesën e SPAK për arrestimin e ish-zv/kryeministrit Arben Ahmetaj, pati dy zhvillime shqetësuese.
Sipas saj, problemi i parë ishte fakti se deputetët e PS-së i dolën në krah kërkesës së avokatëve të Arben Ahmetajt që kërkuan shtyrjen e mbledhjes, për të pasur më shumë kohë për realizimin e mbrojtjes. Dhe problemi i dytë, sipas deputetes demokrate, kishte të bënte me faktin se Arben Ahmetaj ka patur kohën e mjaftueshme për t’u larguar nga Shqipëria.
Në studion e A2Cnn, Tabaku tha se opozita kërkoi zhvillimin e mbledhjes me dyer të hapura për të bërë transparencën e çështjes, por kjo nuk u realizua.
“Faktet që kanë dalë në media kanë treguar se si i gjithë shteti ka qenë në shërbim të këtyre biznesmenëve.
Në atë dosje tregohet se si Ahmetaj ka ndikuar për vendime të Këshillit Bashkiak dhe Këshillit të Ministrave në favor të dy biznesmenëve”, shtoi Tabaku.
Discussion about this post