Kryeministri grek Kyriakos Mitsotakis ka kërkuar gjatë takimit me homologun shqiptar Edi Rama zgjidhjen urgjente të çështjes së Fredi Belerit, kryebashkiakut të zgjedhur të Himarës, i cili prej 50 ditësh ndodhet në paraburgim, me akuzën e blerjes së votave.
Mitsotakis i ka kujtuar Ramës se në Shqipëri ka një pikëpyetje të madhe të shtetit të së drejtës, dhe sipas tij, ky element është një nga kriteret e anëtarësimit të Shqipërisë në BE.
Takimi mes dy kryeministrave vjen në një kohë kur marrëdhëniet ndërmjet Tiranës dhe Athinës janë tensionuar për shkak të arrestimit të kryetarit të zgjedhur të bashkisë së Himarës, Fredi Beleri. Athina zyrtare e ka konsideruar arrestimin e Belerit si me prapavijë politike, çka ka sjellë replika të ashpra ndërmjet dy qeverive.
Kryebashkiaku i sapozgjedhur i Bashkisë së Himarës Fredi Beleri u arrestua më 12 maj në lokalin e tij, teksa ofronte para për të vlerë 8 vota në shifrën e 40 mijë lekëve. Arrestimi erdhi pas denoncimit në prokurori nga një person, i cili kishte treguar se i ishin ofruar para në këmbim të votave.
Athina zyrtare ka reaguar ashpër ndaj Shqipërisë ku ka kërkuar vazhdimisht lirimin e Belerit dhe sipas tyre, ai po mbahet në burg politikisht.
Discussion about this post