Tre ditë më parë autoritetet turke arrestuan në Stamboll shqiptarin Dritan Rexhepi, një ndër më të kërkuarit në Botë jo vetëm nga autoritetet shqiptare, por edhe ato italiane. Si Shqipëria ashtu edhe Italia kërkojnë ekstradimin e Rexhepit nga Turqia, ndërsa nuk dihet se ku do e dorëzojnë autoritetet turke.
Rexhepi u arrestua në një vilë luksoze, pas informacioneve të shërbimeve italiane për ato turke. Duket se shërbimet italiane kanë ndjekur fëmijët e Rexhepit dhe bashkëshorten e tij për të zbuluar më pas shqiptarin.
Por gazetari Flamur Vezaj në një intervistë për Euronews Albania thotë se për kapjen e shqiptarit është angazhuar edhe DEA.
Kjo sipas tij ka ndodhur për shkak të lidhjeve të fuqishme që shqiptari ka pasur me grupe dhe organizata ndërkombëtare të trafikut të drogës.
“Ajo që unë mendoj se e bën të fuqishëm Rexhepin janë lidhjet e tij kriminale me grupet e Amerikës Latine dhe me grupet shqiptare që kishin akses me grupet mafioze italiane nëpërmjet për kontrollin e porteve.
Në porte të ndryshme të Europës disa shqiptarë kanë kontakte të drejtpërdrejta me grupe mafioze italiane për të nxjerrë sasi të mëdha të kokainës nga porte të ndryshme. Kjo e bënte të fuqishëm Rexhepin për shkak se kishte njohje. Nuk kam parë në karrierën time që një personazh i tillë të pasqyrohet në aq shumë media ndërkombëtare.
Nga informacionet që kam, kontribuues ka qenë dhe DEA- Amerikane për shkak se ishte një nga personazhet më në kërkim të të gjitha vendeve. Është një bashkëpunim mes Interpolit dhe DEA-s arrestimi i tij. Mendohet se është njoftuar INTERPOL për vëzhgimin e bashkëshortes dhe fëmijëve të tij, që çoi deri në arrestimin e tij”, tha ai.
Discussion about this post