Arrestimi i Ilir Metës, zbardhen akuzat. Masë sigurie edhe për Kryemadhin

Ish-presidenti Ilir Meta, aktualisht kryetar i Partisë së Lirisë në opozitë u arrestua këtë të hënë me urdhër të Porkurorisë së Posaçme.

Meta akuzohet për korrupsion të kryer në bashkëpunim në tre raste, për pastrim parash dhe mosdeklarime e fshehje të pasurisë.

Burime zyrtare të SPAK thanë se të dhënat mbi këtë arrestim do të bëhen të ditura në vijim.

Ilir Meta është një nga figurat qëndrore të politikës shqiptare dhe përgjatë tranzicionit ka mbajtur postet më të larta shtetërore si kryeministër (1999-2002), kryetar i Kuvendit (2013-2017) dhe President i Republikës (2017 -2022).

Pas largimit nga Presidenca, Meta rimori kontrollin e partisë së themeluar prej tij, Lëvizja Socialiste për Integrim dhe i ndryshoi emrin në Partia e Lirisë.

Hetimet për Metën kanë nisur vitin e kaluar dhe në fillim të janarit, Gjykata e Posaçme e Apelit, la në fuqi një masë sekuestroje ndaj një telefoni në pronësi të ish-bashkëshortes së tij, Monika Kryemadhi, gjithashtu pjesë e hetimit. Kryemadhi e kundërshtoi sekuestron fillimisht në Gjykatën e Posaçme të Shkallës së Parë, por u rrëzua, duke pasur të njëjtin fat dhe në Apel.

Meta është paraqitur në SPAK më 13 qershor dhe pasi doli nga një seancë pyetjesh, ngriti akuza se po hetohej në cilësinë e kundërshtarit të “narkoshtetit” dhe “narkoregjimit”.

Për të njëjtin procedim penal, me kërkesë të SPAK, Gjykata ka miratuar edhe një masë sigurie “detyrim paraqitje” për Monika Kryemadhin, bashkëshorten e kreut të PL-së, me të cilin disa muaj më parë ai njoftoi nisjen e procedurave të divorcit.