Lëvizja Socialiste për Integrim ka dorëzuar në SPAK materiale të tjera shtesë të cilat, sipas tyre provojnë abuzimet në lidhje me aferën e inceneratorëve. Materialet shtesë që i janë dorëzuar SPAK-ut kanë të bëjnë me inceneratorin e Tiranës, të Elbasanit dhe të Fierit, të cilët opozita i konsideron si aferën më të madhe korruptive të bërë ndonjëherë.
Në kuadër të kësaj afere është arrestuar dy ditë më parë ish-ministri i kësaj force politike, Lefter Koka, pasi akuzohet për korrupsion dhe pastrim parash, si dhe janë shpallur në kërkim Stela Gugallja dhe Klodian Zoto. Ata akuzohen se kanë kryer transaksione të rreme me paratë e marra nga buxheti i shtetit për llogari të kontratës koncesionare. Po ashtu ata i kanë dhënë ryshfet ish-ministrit në mënyrë që ky i fundit të lejonte ndërtimin e inceneratorit.
Në shkresën dorëzuar SPAK, kryetarja e LSI shprehet se mbetet e hapur për të bashkëpunuar me këtë organ në mënyrë që të kontribuojë për një hetim sa më objektiv të kësaj çështjeje. Lëvizja Socialiste për Integrim ka depozituar më herët tre padi, të shoqëruara me dokumente për inceneratorin e Tiranës, të Elbasanit dhe Fierit.
Discussion about this post