Kreu i Grupit Parlamentar të Partisë Demokratike, Enkelejd Alibeaj ka reaguar lidhur me lajmin e arrestimit të kryetarit të të përndjekurve politikë të Mirditës, Kol Nikolli, duke kërkuar lirimin e menjëhershëm të tij.
Në deklaratën e tij, Alibeaj ka risjellë dhe njëherë në vëmendje skandalin e inceneratorëve, ku shkruan se në “pushtetin e Ramës nëse vjedh 430 milion euro, shëtit i lirë, por si qytetar i këtij vendi përfundon pas hekurave”.
“Ndalimi në kufi si një kriminel, i një personaliteti që përfaqëson të përndjekurit politikë, familjarisht te persekutuat nga komunizmi, siç është rasti i Kol Nikollit, është padyshim prova që ky pushtet është kundër qytetarëve shqiptarë. Në vend që të ndalojnë ata që me aferën e inceneratorëve vodhën 430 milion euro, ndalojnë Kol Nikollin, vetëm se pretendohet se ka dalë krah qytetarëve të vet që ngritën zërin për rritjen e çmimeve. Pra, në shtetin e Edi Ramës, nëse vjedh 430 milion euro, shëtit i lirë e shkon në të gjithë botën, por ama nëse bën detyrën si qytetar i këtij vendi përfundon pas hekurave. PD i kërkon autoriteteve të lirojnë menjëherë kreu e shoqatës së të përndjekurve politikë Kolë Nikolli dhe ti kërkojnë falje publike”, shkruan Alibeaj.
Kujtojmë se, Kol Nikolli u arrestua sot pasi ishte në kërkim kombëtar për protestën e zhvilluar në muajin mars për rritjen e çmimeve, ku disa qytetarë vendosën kuti dhe bllokuan Rrugën e Kombit në hyrje të Rrëshenit.
Ai po tentonte të kalonte kufirin për të shkuar drejt Italisë përmes aeroportit të Potgoricës dhe i është komunikuar urdhër arresti, lëshuar në lidhje me protestën e zhvilluar në muajin mars për çmimet ku u bllokua Rruga e Kombit në hyrje të Rreshenit.
Discussion about this post