Droga e ish-komandos dhe efektivit të “Rrugores” të arrestuar sot në Turqi, kaloi pa probleme në Rinas dhe u zbulua në aeroportin Sabiha Gökçen të Stambollit Sipas të dhënave të deritanishme, të dy akuzohen për trafikimin e rreth 31 kilogram kanabis, e cila ishte e fshehur në dy valixhe të ndryshme. Kanabisi u transportua në Turqi nga aeroporti i Rinasit drejt aeroportit Sabiha Gökçen të Stambollit. Nuk dihet sesi droga ka kaluar në Rinas, por në aeroportin e Stambollit u zbulua thuajse menjëherë.
Droga u zbulua gjatë kontrollit me rrezes X dhe qenve nuhatës të policisë turke. Më pas, u krye kontrolli i imtësishëm i të gjithë pasagjerëve në avion. Në pranga u vunë Florenc Bicerri, punonjës i policisë rrugore të Tiranës dhe Kujtim Çeliku, një tjetër shqiptar me precedent në vjedhje në Shqipëri. Bicerri ishte larguar më datën 5 tetor dhe nuk ishte paraqitur në punë pas përfundimit të pushimit, ndaj dhe kishte nisur një hetim disiplinor ndaj tij. Pas arrestimit të tij në Turqi, Drejtori i Përgjithshëm i Policisë së Shtetit ka urdhëruar përjashtimin e menjëhershëm dhe përgjithmonë, nga Policia e Shtetit.
Ndërkohë që hetimet vazhdojnë për të zbuluar të implikuar të tjerë në grupin e trafikut të drogës. Përveç Bicerrit dhe Çelikut, është vendosur në pranga dhe Adrian Qirici, por edhe një person tjetër i huaj.
Discussion about this post