Kantautori Gjergj Leka ka shpërthyer në komente pas arrestimit të ish-drejtorit të Radio Televizionit Shqiptar, Thoma Gëllci.
Me anë të një postim në Facebook, Leka u bën thirrje gjykatësve që t’i japin dënimin e merituar dhe të gjithë do ju jenë mirënjohës.
Sipas kantautorit Leka, kjo që po i ndodh Gëllçit është ‘haku’ i gazetarit të ndjerë Kostandin Grillo, të cilin e ka pushuar nga puna më herët.
“Te dashur miq gjykatës, miq të muzikës e të së vërtetës…..Këtë maskara hajdut, Thoma Gëllçi, mbajeni në kafaz e hidhjani sa më larg çelësin! Do t’ju jetë mirënjohës arti, muzika, kultura madje edhe vetë estetika! Ndyrësire mbi ndyrësirat. E zunë haqet e Kosta Grillos që e pushoi nga puna legeni!”- shkruan ai.
Kosta Grillo ka folur pa dorashka rreth një konflikti të nisur disa vite më parë mes tij dhe ish-drejtorit të Radio Televizionit Shqiptar, Thoma Gëllçi, i cili ka degjeneruar në kërcënimin me jetë të Grillos.
Në Shqipëri, ish drejtori i Radio Televizionit publik Shqiptar (RTSH), Thoma Gëllçi u arrestua të premten, pasi Gjykata e Posaçme e Shkallës së Parë për Korrupsionin dhe Krimin e Organizuar pranoi një kërkesë të paraqitur nga SPAK. Zoti Gëllçi dyshohet për “shpërdorim të detyrës”, në rastin e një tenderi të organizuar në nëntor të vitit 2018 për blerjen e disa pajisjeve për kanalin RTSH Agro.
