Atentati që tronditi Elbasanin mbrëmjen e 30 qershorit la të vdekur Klevi Bahon dhe të plagosur të vëllanë e tij Aldo Baho. Ngjarja ndodhi rreth orës 12:30 minuta në kohën kur vëllezërit po ktheheshin me automjetin e tyre në shtëpi.
Dy vëllezërit ishin duke udhëtuar në automjetin e tyre tip “Audi” kur u qëlluan me breshëri automatiku, mbi 35 herë nga një tjetër makinë në Broshkë në aksin Peqin- Elbasan, ku mendohet se kanë qenë të paktën dy persona, të cilët i sulmuan. Atyre iu zu pritë në momentin që po iknin për në shtëpi, pasi autorët i kishin pikasur lëvizjet e tyre.
Nga hetimet e policisë në atë kohë, mësohet se ngjarja ndodhi për larje hesapesh dhe mbyllje pazaresh droge. Klevin Baho rezultoi se ishte dënuar në Itali për trafik droge. Pikërisht aktiviteti kriminal i të riut në Itali dhe prishja e pazareve të drogës u bë shkak që të porositet vrasja e tij.
Vetë vëllai i madh i viktimës, Aleksandër Baho, ka mohuar që të ketë konflikte. 30-vjeçari mori tre plumba në shpatull, ndërkohë që vëllai i tij i vogël mori plagë në kokë, gjë e cila i shkaktoi dhe humbjen e jetës.
Kujtojmë që ditën ne sotme me kërkesë të drejtësisë italiane, është arrestuar Aldo Baho, i njohur si ‘Sakati’. Baho është prangosur teksa po kalonte në drejtim të Greqisë dhe pritet që autoritetet italiane të kërkojnë ekstradimin e tij, pasi e kërkojnë për përfshirje në trafik narkotikësh, në kuadër të një grupi kriminal.
