Kapet drogë me vlerë 500 mijë euro në Tiranë

Policia në Tiranë njofton se ka shkatërruar një grup që merrej me trafik të drogës në kryeqytet.

Sektori kundër Narkotikëve në DVP Tiranë ka finalizuar një operacion, ku si rezultat janë sekuestruar 10 mijë kokrra lëndë narkotike ekstazi. Ndërsa janë arrestuar 5 persona.

Grupi operonte në zonën e Myslym Shyrit, Ish Bllokut dhe nëpër disa lokale në Tiranë.

Mësohet se nëse lënda narkotike do të shitej në treg, do të kapte vlerën 500 mijë euro. Droga sintetike sapo kishte ardhur në kryeqytet dhe ishte për tregun e brendshëm.

Lënda narkotike dyshohet se vinte në vendin tonë nga Kosova. Nga të arrestuarit, tre janë shtetas të Shqipërisë dhe dy të Kosovës.

Hetimet për operacionin antidrogë në fjalë kanë nisur pesë muaj më parë. Një dozë e drogës së sekuestruar shitej në treg për çmimin 30-50 euro.