Një skandal korrupsioni ka shpërthyer në Maqedoninë e Veriut, ku janë arrestuar pesë persona, mes tyre drejtori i Agjencisë për Pagesat e Ndihmës dhe Zhvillimit Rural, Ilia Stoilev.
Sipas hetimeve, Stoilev akuzohet se ka kërkuar 50 mijë euro ryshfet për të miratuar një subvencion të Bashkimit Evropian për një biznes bujqësor në pronësi të një ish-ministri. Ai u kap në flagrancë me 400 euro, që ishin paradhënie e shumës së plotë.
Të gjitha fondet që dyshohet se janë abuzuar vijnë nga programi IPARD i BE-së, që mbështet fermerët dhe investimet në bujqësi.
Pas arrestimeve, qeveria maqedonase ka pezulluar përkohësisht të gjitha subvencionet e BE-së, derisa të përfundojnë hetimet.
Kryeministri Christian Mickoski tha se pezullimi u bë për të kontrolluar çdo parregullsi, ndërsa opozita SDSM e akuzoi qeverinë për korrupsion dhe paralajmëroi se vendi rrezikon të humbasë deri në 100 milionë euro ndihmë nga BE-ja.
Nga ana tjetër, Komisioni Evropian ka kërkuar informacion shtesë dhe nuk përjashton që në hetim të përfshihet edhe Zyra Evropiane Kundër Mashtrimit (OLAF). Nëse vërtetohen shkelje, Maqedonia e Veriut mund të detyrohet të kthejë paratë e marra nga fondet e BE-së.
Discussion about this post