Kreu i PSD-së Dardan Molliqaj dhe pesë aktivistë të kësaj partie janë arrestuar ditën e sotme në Kosovë. Mediat kosovare, shkruajnë se lajmin për arrestimin e ka konfirmuar zëdhënësja e partisë, Natyra Kuçi.
Bashkëshorti i ish-ministres së Arsimit në Shqipëri, Besa Shahini, është arrestuar pasi ka kundërshtuar konferencën e zëdhënëses së Gjykatës Speciale, Ekaterina Trendafilova deri në ndërprerjen e fjalimit të saj me britma e fërshëllima.
Ata fillimisht protestuan jashtë sallës ku po mbahej konferenca dhe më vonë u futën brenda ku Trendafilova do të mbante fjalën e saj. Më pas kanë qenë forcat policore që kanë ndërhyre për të qetësuar situatën dhe arrestuar Molliqajn dhe aktivistët e tjerë.
Dardan Molliqaj ndryshe njihet si bashkëshorti i Besa Shahinit, ish- ministres së Arsimit që shërbeu në vendin tonë për më pak se dy vite. Ata u martuan në vitin 2019 kur Shahini ishte ende ministre, ndërsa Molliqaj vetëm deputet i Parlamentit të Kosovës.
