Policia e Shkodrës në bashkëpunim me forcat “Shqiponja” dhe Njësinë Operacionale, kanë bërë të mundur arrestimin e 30-vjeçarit Luverdo Kola. Në njoftimin e bërë zyrtar nga Policia e Shtetit bëhet me dije se është përmbyllur me sukses aksioni “Alavana” ku është arrestuar një person dhe është shpallur në kërkim një tjetër.
Kola ka qenë i shpallur në kërkim nga policia për ngjarjen e 1 shtatorit të vitit 2020, ku plagosi Tonin Larushkun për parkimin. Prej ngjarjes së shtatorit të 2020-ës, Kola ka qëndruar në arrati, ndërsa 38-vjeçari Larushku shpëtoi fatmirësisht nga breshëria e plumbave.
Mbi autorin e ngjarjes rëndojnë veprat penale: “Vrasje me dashje” mbetur në tentativë dhe “Armëmbajtje pa leje”.
Gjatë aksionit nga policia, Kolës i është sekuestruar dhe një armë zjarri e llojit pistoletë, një karikator dhe disa fishekë.
Ky që shihni në foto është Luverdo Kola, autori i plagosjes dhe i arrestuar nga Policia e Shtetit
Shpallet në kërkim një tjetër anëtar i grupit dhe bëhet fjalë për Gezim (Gjin) Çakajn. Në kontrollet e bëra në banesën e tij, u gjetën 80 kg lëndë e dyshuar kanabis si dhe një sasi municion luftarak.
Kujtojmë këtu se bëhet fjalë për grupin e drejtuar prej 30-vjeçarit Luverdo Kola, anëtarët e të cilit janë shpallur në kërkim nga policia.
