Arrestohet në Marok portugezi që vrau Ardian Nikulajn

Portugezi Ruben Saraiva, i cili akuzohet se ekzekutoi biznesmenin Ardjan Nikulaj në Shëngjin, është arrestuar në Marok.

Burime zyrtare pranë Policisë së Shtetit konfirmojnë se vënia në pranga u krye me qëllim ekstradimi drejt vendit tonë.

Arrestimi

“Policia marokene, pas shkëmbimit të informacionit mes Interpol Tiranës dhe Interpol Rabat, Marok, ka bërë të mundur lokalizmin në Rabat, Marok, kapjen dhe vënien në pranga, me qëllim ekstradimin drejt Shqipërisë, të shtetasit portugez R. R. S., 28 vjeç. Gjykata e Shkallës së Parë e Juridiksionit të Përgjithshëm Lezhë, me vendimin nr. 97, të datës 26.04.2023, ka caktuar masën e sigurisë ‘Arrest në burg’, për veprat penale ‘Vrasja për gjakmarrje’ dhe ‘Prodhimi dhe mbajtja pa leje e armëve luftarake dhe e municionit’”, njofton policia.

Policia e Shtetit në bashkëpunim me agjencitë ligjzbatuese dhe me autoritetet marokene, po punon për të bërë të mundur ekstradimin e 28-vjeçarit, drejt Shqipërisë. Ndërkohë, vijon intensivisht puna kërkimore në bashkëpunim të ngushtë me partnerët, për lokalizimin dhe kapjen edhe të shtetasit të fundit të shpallur në kërkim në lidhje me këtë ngjarje”, thuhet më tej në njoftim.

Vrasja

Vrasja ndodhi mesditën e 19 prillit, kur sipas hetimeve ishte portugezi i maskuar i cili qëlloi me armë zjarri mbi Ardian Nikulaj, teksa ky i fundit ishte i ulur në lokalin e tij, ndërsa më pak u largua me motor.

Nikulaj njihej si një biznesmen ndërtimi në zonë, ndërsa ka qenë edhe kandidat për deputet në zgjedhjet e vitit 2021.

Krimi sipas hetimeve, ka lidhje me një konflikt mes fisit Nikulaj dhe Lekstakaj. Edmond Haxhia, i cili akuzohet si organizator i vrasjes, është nip në fisin Lekstakaj.

Hetuesit besojnë se ai kishte punësuar “killerin” portugez për të kryer atentatin, si dhe 4 britanikë në role ndihmëse.

Më herët, Haxhia dhe tre shtetas britanikë – Steven Hunt e Thomas Mithan dhe Harriet Bridgeman, u ndaluan nga autoritetet e Britanisë për llogari të atyre shqiptare.

Lexo edhe: