Një operacion i koordinuar nga Prokuroria Speciale e Republikës së Kosovës (PSRK) dhe Policia e Kosovës ka çuar në arrestimin e prokurorit Beqë Shala të Prokurorisë Themelore në Prizren. Shala u arrestua ditën e hënë në vendin e tij të punës nën dyshimin se ka kryer veprën penale “Marrja e ryshfetit”.
Arrestimi i prokurorit Shala erdhi si rezultat i një hetimi disa-javor të monitoruar dhe të kontrolluar nga organet e rendit.
Sipas mediave në Kosovë, prokurori është kapur në flagrancë në momentin që dyshohet se po pranonte një shumë parash nga një person. Ky person ishte palë në një rast penal që Shala kishte trajtuar.
“Prokurori është kapur në flagrancë duke marrë para, pas një hetimi të monitoruar nga organet e rendit. Operacioni është kryer në mënyrë të kontrolluar dhe me urdhër të Prokurorisë Speciale,” tha një zyrtar i përfshirë në rast për Insajderin.
Operacioni u realizua nga hetues policorë nga Drejtoria për Hetimin e Krimit të Organizuar dhe Krimeve të Rënda, në bashkëpunim të ngushtë me Kryeprokurorin e Prokurorisë Themelore në Prizren dhe nën udhëheqjen e Prokurorisë Speciale, duke përfshirë edhe mbledhjen e provave vizuale dhe audio.
PSRK dhe Policia e Kosovës po vazhdojnë të gjitha veprimet e nevojshme hetimore në përputhje me Kodin e Procedurës Penale dhe ligjet në fuqi.
Discussion about this post