Mazhoranca dhe opozita në Kuvendin e Shqipërisë duket se janë dakordësuar përsa i takon rezolutës që pritet të miratohet në seancën e së enjtes lidhur me Kosovën.
Kështu referuar draftit final, Kuvendi i Shqipërisë mbështet rezolutën e miratuar nga Kuvendi i Kosovës më 28 shtator, ndërsa kërkon nga institucionet kushtetuese të Republikës së Shqipërisë, që në të gjitha instancat ndërkombëtare të angazhohen fuqimisht dhe të ndërmarrin të gjitha veprimet e nevojshme për mundësimin e një hetimi ndërkombëtar lidhur me aktin terrorist në veri të Kosovës.
Në seancën e fundit në Kuvend, deputetët e opozitës kërkuan nga mazhoranca që të miratohej një rezolutë në emër të Kuvendit të Shqipërisë, ku të miratohej rezoluta e Parlamentit të Kosovës, sikundër të shprehej një qëndrim i Parlamentit të Shqipërisë.
Në draft-rezolutën e hartuar, pika e parë është pikërisht ajo që Kuvendi i Shqipërisë mbështet rezolutën e miratuar nga Parlamenti i Kosovës. Gjithashtu në draft-rezolutë sulmi ndaj Kosovës cilësohet si terrorist, term ky që më parë nuk është përdorur qoftë nga Kryeministri Edi Rama ashtu edhe ministrat e tij, kur kanë folur për çështjen.
Draft rezoluta
KUVENDI I REPUBLIKËS SË SHQIPËRISË:
Mbështet plotësisht dhe njëzëri Rezolutën Nr. 08-R-009 të Kuvendit të Republikës së Kosovës, miratuar në seancën e tij plenare të datës 28 shtator 2023;
Kërkon nga institucionet kushtetuese të Republikës së Shqipërisë, që në të gjitha instancat ndërkombëtare sikurse dhe në kontaktet bilaterale me partnerët tanë të angazhohen fuqimisht dhe të ndërmarrin të gjitha veprimet e nevojshme për mundësimin e një hetimi ndërkombëtar lidhur me aktin terrorist në veri të Kosovës;
Inkurajon Qeverinë e Republikës së Kosovës që të punojë krah për krah dhe të bashkohet pa rezerva me aleatët e saj strategjikë, Bashkimin Europian dhe Shtetet e Bashkuara të Amerikës, në funksion të procesit për arritjen e një marrëveshje përfundimtare për normalizimin e marrëdhënieve midis Kosovës dhe Serbisë dhe njohjen përfundimtare të Kosovës prej saj.
Discussion about this post