Kryeministri Edi Rama, prezantoi sot Bordin e Akreditimit të Agjencisë së Sigurimit të Cilësisë në Arsimin e Lartë.
Kreu i qeverisë theksoi se skuadra e re përbëhet nga ekspertë të nivelit më të lartë ndërkombëtarë, shqiptarë që shkëlqejnë në botën akademike jashtë vendit si edhe të huaj që mishërojnë kriteret më të larta të botës akademike.
“Dua të falënderoj të gjithë ata që kontribuuan në bordin e Akreditimit. Dua të falënderoj anëtarët e parë për përkushtimin dhe kontributin e pakursyer. Bordi është i përbërë nga një numër harmonik ekspertësh shqiptarë dhe të huaj që shkëlqejnë në karrierën e tyre akademike në vende të ndryshme. I jam mirënjohës sinqerisht të gjithëve për gatishmërinë dhe patjetër dhe dispononim e pakursyer që të na japë një dorë në këtë proces. Se vë në diskutim që të paktën pjesa shqiptare e bordit të ri e njeh mirë problematikën e arsimit tonë të lartë. Është e familjarizuar me problemet, shqetësimet dhe kritikat. Duhet ta çojmë në nivel tjetër, arsimin tonë të lartë. Ne vijmë nga një rrugë e përpjetë dhe pak vite më parë ne na u desh të përballeshim me një situatë ku rrjeti i universiteteve tona ishte rrjet i shthurur dhe i thurur sipas orekseve.”, -tha ai.
Gjithashtu, gjatë fjalimit të tij, Rama shprehet edhe për rekordet që Shqipëria ka arritur me programet mësimore, duke filluar që nga diplomat e dhëna e deri tek nota mesatare me të cilat janë regjistruar studentët.
“Rekordet që ne kemi arritur janë me të vërtetë mbresëlënëse. Arritëm të kemi 1432 programe të ndryshme mësimore. Nota mesatare e të regjistruarve ishte 9.5. Disa prej këtyre programeve ishin ato që nxirrnin mësuesit e ardhshëm, por edhe drejtues të bordeve. Janë dhënë një rekord diplomash, afro 1000, për personat që nuk njihnin gjuhën shqipe. Janë dhënë diploma nga universitete private, ku studentët nuk paguanin universitetin por merreshin me punime të tjera në funksion të pronarëve të universitetit.”- u shpreh Rama
