Kanë qenë të shumta rastet kur kryeministri Edi Rama ka kritikuar Kosovën për refuzim që i ka bërë nismës së “Open Balkan”, ku ironitë nuk kanë munguar as në këtë konferencë.
Rama tha se nisma e “Ballkanit të Hapur” nuk është vetëm e tre vendeve dhe arsyet e refuzimit të vendeve që nuk janë pjesë, i konsideron të pamjaftueshme.
“Ballkani i Hapur është i të gjithëve, nuk është vetëm i tre vendeve, por as Shqipëria, as Serbia dhe as Maqedonia e Veriut, nuk do të presin sa të binden të tjerët. Arsyet se pse janë refuzues të tjerët i kam dëgjuar, i kam dëgjuar me shumë vëmendje të tre, më vjen shumë keq, por i konsideroj arsye të mos arsyes. Pse ça ju duken ju interesat ekonomike të Shqipërisë? Ju duken gjë e vogël, për çfarë do jem këtu unë për interesat ekonomike të Gjermanisë. Interesat ekonomike fuqizohen direkt nga Ballkani i Hapur”, tha Rama.
Rama nuk i ndali ironitë kur tha se lehtësimi i punës për sipërmarrësit e tre vendeve, do të bëjë që bizneset e vendeve të tjera të kërkojnë të bëhen pjesë e Ballkanit të Hapur edhe më shpejt sesa vetë qeveritë e tyre
“Kur ne të bëjmë samitin e radhës në Tiranë, në muajin dhjetor, kur ne t’iu dorëzojmë sipërmarrësve atë që kemi ndërmend, për një kanal jeshil, mos u çudisni që kompanitë nga Mali i Zi, Bosnja dhe Kosova, do të vinë te Ballkani i Hapur më parë se qeveritë e tyre. Mos u çudisni, se kjo nuk është një iluzion, kjo është një kërkesë ulëritëse e ekonomive tona, e njerëzve tanë, e njerëzve që duan të lëvizin për turizëm. Pse ça jemi ne, të lëmë sikur nuk ekziston potenciali që ka vendi ynë për turizëm, po patjetër interesat ekonomike të Shqipërisë”, u shpreh Rama.
Takimi i radhës rreth kësaj nisme do të mbahet në Tiranë, pas Krishtlindjeve, datë të cilën do ta vendosë kryeministri Rama.
Discussion about this post