Gazetari Artan Hoxha është shprehur se i shumëkërkuari që është zhdukur pa gjurmë prej 9 gushtit, Ervis Martinajt, nisi të godiste, kur në vitin 2013 tentuan t’i merrnin lojërat e fatit. I ftuar në ‘TPZ’, Hoxha tha se para se të bëhej operacioni për mbylljen e lojërave të fatit, Martinaj e kuptoi se çfarë po ndodhte dhe tentoi të bënte marrëveshje me socialistët. Gazetari tha gjithashtu se ai ka goditur njeriun që cilësohej si i afërt dhe që kishte sponsorizuar fushatën e ministrit të brendshëm të asaj kohe, Saimir Tahiri.
“Ervis Martinaj, historinë e tij me botën e krimit, e ka nisur për të qenë faktor në lojërat e fatit. Kur ndodhi ndryshimi i pushtetit dhe pushteti i ri kërkonte të merrte nën kontroll kanabisin dhe pastaj bastet, që janë narkotikët dhe bixhozit, dy të ardhurat kryesore të mafias. Para se të bëhej operacioni i famshëm, Martinaj, duke e ditur se çfarë po ndodhte tentoi të bënte një marrëveshje me ata që do të vinin në pushtet, sepse ai njihej si lidhje e fortë e atyre që u larguan nga pushteti, pra të djathtës. Edhe prej traditës familjare, miqësive të babait, etj. Ky që në 2013, kur pushteti tentoi t’i marrë lojërat e fatit, ai u kundërpërgjigj dhe njeriu që ai goditi, cilësohej si njeriu më i afërt që kishte sponsorizuar fushatën e ministrit të brendshëm të asaj kohe, Saimir Tahiri,”- tha Hoxha ndër të tjera.
Aksioni i policisë
Deklarata e Hoxhës, vjen disa orë pasi sot, Policia e Shtetit ka ushtruar kontrolle në Fushëkuqe, Vlorë dhe në Shijak, ku janë kërkuar gjurmë e të dhëna që do të mund të hedhin dritë mbi fatin e të shumëkërkuarit të zhdukur pa gjurmë që prej 9 gushtit, Ervis Martinaj. Fushëkuqja e Kurbinit, zona ku dhe jeton familja e Martinajt ishte e rrethuar për pesë orë gjatë ditës së sotme. Por, deri më tani nuk është raportuar për gjetjen e ndonjë të dhëne të re në lidhje me fatin e ish-bossit të lojërave të fatit. Policia e Shtetit doli nga Fushëkuqja me armë e municione luftarakë, por pa ndonjë gjurmë konkrete që mund të zgjeronte hetimet për 40-vjeçarin e zhdukur.
Discussion about this post