Gazeta belge Nieuwsblad i ka kushtuar një artikull të gjatë protestave në Shqipëri, duke shkruar se lëvizja që nisi për kundërshtimin e projektit turistik të Ivanka Trump në ishullin e Sazanit është shndërruar në një revoltë më të gjerë kundër kryeministrit Edi Rama.
Sipas autorit Jesse Van Regenmortel, protestat fillimisht u organizuan për të kundërshtuar ndërtimin e një resorti luksoz në Sazan, projekt që parashikon miliarda dollarë investime nga Ivanka Trump, Jared Kushner dhe investitorë të tjerë ndërkombëtarë. Gazeta shkruan se qeveria shqiptare e shpalli projektin “investim strategjik”, duke përshpejtuar procedurat për miratimin e tij.
Artikulli thekson se lëvizja protestuese, e quajtur “Revolucioni i Flamingove”, mori këtë emër për shkak të shqetësimeve për dëmtimin e habitatit të flamingove dhe ekosistemit të zonës. Sipas gazetës, protestat që zhvillohen prej javësh në Tiranë kanë kaluar tashmë përtej çështjes mjedisore dhe janë kthyer në kërkesa për dorëheqjen e kryeministrit.
Nieuwsblad shkruan se ndaj Ramës vazhdojnë të ngrihen akuza për korrupsion, përqendrim të pushtetit dhe manipulim zgjedhor, ndërsa përmend edhe një hetim antikorrupsion që lidhet me ndryshimet ligjore të miratuara në vitin 2024 për projektet turistike në zonat e mbrojtura.
Në artikull citohet edhe qëndrimi i kryeministrit Rama, i cili ka deklaruar se Shqipëria nuk duhet të krijojë imazhin e një vendi armiqësor ndaj investitorëve dhe se projekti nuk do të ndalet për sa kohë ai është në detyrë.
Gazeta belge rikujton gjithashtu se Rama u bë i njohur ndërkombëtarisht si kryetar i Bashkisë së Tiranës, ndërsa si kryeministër ka udhëhequr uljen e papunësisë, rritjen e investimeve të huaja dhe hapjen e negociatave të Shqipërisë për anëtarësim në Bashkimin Evropian. Megjithatë, sipas artikullit, ai vazhdon të përballet me kritika dhe akuza nga kundërshtarët politikë dhe protestuesit, të cilët pretendojnë se interesat e investitorëve të huaj po vendosen mbi ato të qytetarëve dhe mjedisit.
Discussion about this post