Kryetari i Bashkisë Krujë, Artur Bushi, sfidon SPAK-un para zgjedhjeve, duke zhvilluar një tender pa garë. Këtë herë Bushi po tregon kujdes për rrugën me kalldrëm në zonën e vjetër të Krujës. Konkretisht, po flasim për prokurimin me objekt “Rijetëzim i kalldrëmit mesjetar Krujë-Sarisalltik, Bashkia Krujë”.
Sipas të dhënave do të vendosen gurë të rinj atje ku ka dëmtime në rrugën 1910 m e gjatë, si dhe do të vendosen disa shtylla ndriçimi. Për këtë qytetarët krutanë do të paguajnë nga taksat 180 milionë lekë.
Shqetësuese në këtë procedurë është fakti që edhe këto 180 milionë lekë i jepen në shkelje të ligjit. Kontrata e publikuar më datë 3 dhjetor 2024 është vlerësuar nga Open Data Albania me “Flamurin e Kuq”, që është shenja e riskut të korrupsionit.
Sipas të dhënave, vetëm firma “CARA” SHPK ka shprehur interes për këtë tender. E kemi vënë në dukje herë pas herë se kur është vetëm një operator në garë rregulli kërkon pezullimin e procedurave, pasi logjikisht duhen dy ose më shumë oferta të vlefshme që të mund të zhvillohet garë konkurruese.
Kështu, pa garë dhe pa konkurrencë, kryetari Bushi ka shpallur si fituese firmën “Cara” SHPK.
Kontrata do të zgjasë 5 muaj me qëllim që kalldrëmi të jetë gati para zgjedhjeve.
Kompania “Cara” sh.p.k. renditet në listën e firmave të favorizuara nga zyrtarët duke marrë tendera pa garë. Kështu, në prokurimet për llogari të programit të Rindërtimit pas tërmetit, “Cara” u përfshi si zbatuese projektesh.
Gjithashtu, kompania me pronar Naim Carën nuk është e rregullt në pagimin e taksave. Më datë 7 korrik 2021, për “Cara” Shpk është kryer vendosja e Masës së Sigurimit të detyrimit tatimor, lëshuar nga Drejtoria e Përgjithshme e Tatimeve, Drejtoria e Mbledhjes së Detyrimeve Tatimore të Papaguara, Rajoni Verior, Shkodër kërkoi vendosjen e barrës siguruese mbi titujt e pronësisë në mënyrë që të mos kryhen veprime tjetërsimi ndaj këtyre titujve për tatimpaguesin “CARA” pajisur me NUIS (NIPT)- K07729920F.
Ndërkohë, vetëm pak muaj më parë, llogaritë e kësaj kompanie ka qenë të bllokuara nga përmbaruesi për shkak të detyrimeve të papaguara. Po t’i shtojmë këtyre fakteve edhe kontratat që kjo kompani ka në dorë, ndërkohë që fitoi këtë tender, vihet në dyshim kryerja në afat dhe me cilësi e punimeve.
Ndërkohë kryetari Bushi u thirr në SPAK në mars të vitit 2023.
Sipas informacioneve ai u thirr pas kallëzimit të një qytetari, Muharrem Hoqja që e akuzon për shpërdorim detyre. Sipas pretendimit të qytetarit Muharrem Hoqja, Bushi i ka vënë përmes organeve që ka në juridiksion, gjobë. Këtë veprim, qytetari e ka kallëzuar në SPAK, me pretendimin se Bushi ka shpërdoruar detyrën. Më konkretisht, Muharrem Hoqja akuzon se Bushi dhe inspektoriati i Bashkisë ndërtimore të Krujës i kanë vendosur 3 gjoba me shumë totale 35 milionë lekë për ndërtim pa leje.
Bushi tha se qytetari kishte kryer 3 ndërtime pa leje ndaj e gjobitën në bazë të ligjit. Meqenëse këto ditë, Qeveria ka propozuar t’i falë këto gjoba, edhe Bushi që i vuri këto masa, “amnistohet”. Ndoshta më vonë do të dalë ndonjë ligj që amniston kryetarët e bashkive nga korrupsioni me tenderat.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet .nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post