Kishin vetëm pak orë që kishin bërë dasmën e tyre, kur shpërtheu lufta në Ukrainë. Yaryna Arieva dhe Sviatoslav Fursin ndonëse kishin planifikuar që të shkonin për muaj mjalti, kanë lënë gjithçka pas dhe i janë bashkuar luftës për të mbrojtur vendin e tyre, Ukrainën.
Çifti do të martohej në maj, por nxituan të lidhnin kurorë në Kiev javën e kaluar kur Rusia nisi sulmin. Të veshur me xhaketa kamuflazhi dhe duke mbajtur një pushkë, çifti tha për CNN se muajin e mjaltit po e kalojnë në një qytet të rrethuar, ndërsa kanë vendosur që të luftojnë për atdheun e tyre.
“Është e vështirë të kuptohet ky realitet i ri që kemi,” tha Arieva, e cila është nga Kievi.
“Askush këtu nuk thotë se do të humbasim. Të gjithë këtu besojnë se do të fitojmë, por është e gjitha vetëm një çështje kohe. Jam shumë e lumtur që shoh një numër të madh njerëzish, të cilët janë vërtet të gatshëm për të luftuar, duke qenë gati të vrasin për tokën e tyre dhe duke mos pasur asnjë dyshim për fitoren tonë në këtë luftë”, përfundoi ajo.
Ndërkohë, bashkëshorti i saj, Fursin, i cili ka lindur në qytetin perëndimor të Lviv tha se “Këta njerëz janë gati të luftojnë për lirinë e tyre.”
Çifti i bën thirrje komunitetit ndërkombëtar që të ndihmojë Ukrainën me para, ushqime, armë dhe ndihmë mjekësore dhe të vendosë më shumë sanksione ndaj Rusisë.
Fursin shprehet optimist se do të vijë së shpejti koha kur ai mund të mbledhë familjen dhe miqtë e tij “të gjithë në një vend dhe të pijë një gotë verë të mirë. Dhe t’u thotë të gjithëve: lufta mbaroi, ne fituam!”.
Kujtojmë se, Ukraina për të 6 ditë me radhë ndodhet nën tensionin e pranisë së forcave ruse në disa qytete.
Discussion about this post