Bashkia Berat po kërkon të blejë asfalt që të rregullojë rrugët për fushatën zgjedhore. Kryebashkiaku Ervin Demo me këtë tender kërkon që të marrë me të mira edhe demokratët e krahut të Bashës. Bëhet fjalë për tenderin me objekt “Blerje asfalti” dhe fond limit 24. 999 990,00 ose afro 2.5 miliardë lekë. Në shqyrtimin e dokumenteve evidentohet se tenderi është dhënë pa garë. Deri në ditën e mbylljes së garë kanë paraqitur dy kompani; “SHKELQIMI 07 sh.p.k” dhe “AEOT” sh.a. Këtë të fundit, kryebashkiaku Demo e ka skualifikuar me arsyetimin se ka mungesë dokumentacioni.
Kështu është lënë në garë vetëm kompania “SHKELQIMI 07 sh.p.k” në pronësi të Shkëlqim Kapllanajt. Open Data i ka vënë këtij projekti “Flamurin e kuq” për shkak të shkeljes së konkurrencës. Por, gjithashtu ky tender ka rritur riskun për abuzim me fondin limit. Për shkak se kompania fituese ka paraqitur ofertën me vlerë 24 211 750,00 lekë sa 99% e fondit limit.
Ndërkaq, kompania e skualifikuar ka paraqitur ofertën me vlerë 20 834 500 lekë, pra 40 milionë lekë më lirë se kompania e Shkëlqimit. Por, Bashkia Berat nuk ka respektuar rregullin për marrjen në konsideratë të ofertës më të lirë. Si në fshehtësi Demo hoqi këto para nga fondet e bashkisë për të arnuar rrugët që të duken bukur gjatë fushatës.
Vëllai i demokratit
Por, kjo çështje ka edhe politikë brenda! Sikur theksuam më lartë, në këtë tender Demo ka përfshirë dhe demokratë. Fituesi Shkëlqim Kapllanaj është vëllai i demokratit Agron Kapllanaj. Ky i fundit i siguronte shumë tenderë korruptiv të vëllait në kohën kur drejtonte Bashkinë Mallakastër. Ndërsa tani po zgjeron rrezen e korrupsionit edhe në bashki të tjera.
Vlen të përmendim se Kapllanaj ka shpallur kandidaturën e tij sërish për Bashkinë Mallakastër, nga krahu i kundërshtarëve të Berishës. Epo të jesh vëllai i një demokrati, që gëzon poste të rëndësishme, sigurisht që të hapet rruga për tenderë të rëndësishëm. Megjithëse, edhe në kohën që pjesa më e mirë e bashkive kanë në drejtim socialistë, Kapllanaj ka marrë shumë tenderë. Nga të dhënat e “Spending Data” rezulton se në dy vitet e fundit “Shkelqimi 07” ka përfituar mbi 2.19 miliardë lekë tenderë. Në dokument shihet Kapllanaj ka përfituar tëndera nga të gjitha bashkitë. Me sa duket vëllai demokrat i ka mirë punët edhe me socialistët.
Lexo edhe: Kapllanaj klienti i Ramës nga PD, Agolli e gostit me 2.2 miliard lekë të FSHZH-së
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post