Edhe mbledh një dorë me vota duke gënjyer banorët me asfalt para zgjedhjeve, edhe bën biznes me tenderat. Kështu po veprohet në Bashkinë Shkodër, ku është vulosur një tjetër procedurë prokurimi me shkelje. Kryebashkiaku Benet Beci e dinte shumë mirë që disa lagje në Shkodër përmbyten sa herë bie shi për shkak të instruktuarës së keqe, por mirë që erdhën zgjedhjet dhe e zgjidhi qesen.
Tani që situata është shumë keq, Beci po hedh sytë nga këto lagje, por duke i bërë llogaritë që të përfitojë edhe një biznesi i një mikut të tij. Konkretisht bëhet fjalë për tenderin që ka si objekt “Rikonstruksion Rruga “Ernest Bushati””, një rrugicë lagjeje në zonën industriale të Shkodrës.
Vetë Beci shkruan në raportin që shoqëron procedurën se në këtë rrugicë nuk është vënë kurrë dorë, përveç ndonjë arnimi asfalti që më shumë ka qenë punë prishësh sa i përket kanalizimeve dhe gropave me ujë.
“Rruga ” Ernest Bushati” është një rruge me gjatësi rreth 278 m . Rruga aktualisht paraqitet e paasfaltuar, me gabarit te pa sistemuar për transport te organizuar me mjete motorike , me një mirëmbajtje sporadike sipas nevojës qe ka patur, çka ka bere qe deri ne shumicën e gjatësisë se saj te disponohen shtresa zhavorri te ngjeshur, ndërkohë qe kullimi i ujërave është bërë sipërfaqësor dhe/ose i paorganizuar, gjë qe sjell për pasojë që në disa segmente të këtij aksi të shfaqen rëndom gjatë periudhës se shirave pjese të mbushura me pellgje uji”, thuhet në dokumentin shoqërues.
Pikërisht tani në mes të dimrit, Beci do t’i hedhë një dorë zhavorr, 5 cm asfalt, t’i pastrojë e kanalet kulluese dhe për këto punime do të shpenzojë 105 milionë lekë.
Mënyra e zhvillimit të tenderit është e dyshimtë. Kjo për shkak se pavarësisht që u ofruan 7 kompani për të marrë pjesë në garë, në të vërtetë nuk pati konkurrencë. 6 oferta, përfshirë këtu edhe ato më të ulëtat, u skualifikuan në fazat e para, duke bërë që në fazën finale të llogaritej vetëm firma “Ndërtuesi 2000” shpk.
Duke qenë se nuk kishte konkurrentë përballë “Ndertuesi 2000” shpk, më datë më datë 7 nëntor 2024, është veçuar si fituese. Kontrata është bërë e njohur më datë 10 dhjetor, një muaj më pas, në Agjencinë e prokurimeve Publike. Open Data Albania e ka vlerësuar tenderin me “Flamurin e kuq” që është shenja e riskut të korrupsionit.
Kujtojmë se pronari i “Ndërtuesi 2000” shpk, Broz Dodaj, është miku i Becit që së fundmi po mbulohet me kontrata nga kryebashkiaku. Dhënia e prokurimeve me “Flamur të kuq” për Dodajn ka nisur shumë kohë më parë.
Ndërkohë, Prokuroria e Posaçme po kryen hetime ndaj kryetarit Beci për korrupsion dhe shpërdorim detyre. Benet Beci po hetohet nga SPAK për procedurat e tenderave në detyrat që ai ka mbajtur në të kaluarën si drejtor ekzekutiv i FSHZH dhe i KESH-it.
Hetimi ka nisur pas sekuestrimit të telefonit të bashkëshortes së Evis Berberit, ish-kreu i Autoritetit Rrugor Shqiptar. Janë zbuluar mesazhe jo vetëm me zotin Beci, por edhe zyrtarë të tjerë në Ministrinë e Infrastrukturës. Pasi janë mbledhur kontrata dhe dokumentacion, prokurorët kanë konkluduar se zoti Beci duhet të jetë person nën hetim.
©️Copyright Gijotina.comKy artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post